22 адценні бэзу: паказваем самыя-самыя сарты з Батанічнага саду

Калі, як не ў маі, ацаніць усю прыгажосць бэзу? У Цэнтральным батанічным садзе Нацыянальнай акадэміі навук расце больш за 200 сартоў. У калекцыі бэзу прадстаўлены дасягненні розных гадоў, у тым ліку 16 сартоў беларускай селекцыі, а тры з іх уключаны ў рэестр Каралеўскіх батанічных садоў. Гэта сарты «Паўлінка», «Мінчанка» і «Партызанка».

Times.by разам з вядучым навуковым супрацоўнікам, куратарам калекцыі бэзу Цэнтральнага батанічнага саду Тамарай Шпітальнай выбраў топ самых-самых сартоў. Мы публікуем іх фатаграфіі, каб вы ведалі, чым адрозніваецца адзін сорт ад другога.

Прыемнага прагляду! На жаль, фота не перадаюць непаўторны водар гэтых кветак. Але вы яшчэ можаце ўбачыць гэта цудоўнае цвіценне сваімі вачыма.

Бэз «Прыгажуня Масквы»

Гэты бэз – шэдэўр селекцыйнага мастацтва, ён лічыцца самым прыгожым на планеце і ў 1947 годзе праславіў савецкую селекцыю.

Сорт «Прыгажуня Масквы» стварыў расійскі селекцыянер Леанід Калеснікаў, скрыжаваўшы сарты «Прыгажуня Нансі» і «Іван Уладзіміравіч Мічурын».

Бутоны ў бэзу шарападобныя, ружавата-ліловыя з атласным бляскам.

Пры гэтым кветкі буйныя, а пялёсткі ружавата-белыя з перламутравым пералівам.

Гэта непаўторны сорт бэзу, які расце ў калекцыях самых вядомых батанічных садоў свету.

Бэз «Вера Харужая»

Сорт назвалі ў гонар беларускай падпольшчыцы, Героя Савецкага Саюза Веры Харужай.

Кветкі ў бэзу буйныя, а пялёсткі па меры цвіцення закручваюцца. Бутоны ярка-бэзавыя, а ў цэнтры пялёсткаў ёсць блакітныя прожылкі.

Бэз «Абаронцам Брэста»

Гэта адзін з першых мемарыяльных беларускіх сартоў бэзу. Сорт названы ў гонар герояў – удзельнікаў абароны Брэсцкай крэпасці ў пачатку Вялікай Айчыннай вайны.

Кветкі ў бэзу махровыя і буйныя (да 2,5 см у дыяметры), ад малочна-крэмавага да чыста-белага адцення, а пялёсткі шырока-акруглыя.

Сорт аўтарства селекцыянераў Мікалая Смольскага і Веранікі Бібікавай.

Бэз «Вялікая Перамога»

Гэта эфектны сорт, які вывелі савецкі селекцыянер Леанід Калеснікаў і яго паслядоўнікі.

Бэз названы ў гонар заканчэння Вялікай Айчыннай вайны.

Кветкі ў сорту буйныя, прыгожага ліловага колеру з блакітнымі ценямі, а пялёсткі падоўжаныя і злёгку выгнутыя.

Бэз «Аляксей Марэсьеў»

Сорт вывеў селекцыянер Леанід Калеснікаў у 1951 годзе. Бэз названы ў гонар легендарнага лётчыка – героя Вялікай Айчыннай вайны Аляксея Марэсьева.

Кветкі тут блакітнавата-ліловыя, а пялёсткі падобныя на прапелер.

Бэз «Андруша Громаў»

Гэты сорт таксама аўтарства Леаніда Калеснікава. Селекцыянер стварыў яго ў гонар сына сяброў, які загінуў у юным узросце.

Кветкі ў бэзу ярка-ружовыя, а бутоны махровыя.

Бэз «Міхаіл Шолахаў»

Сорт назвалі ў гонар пісьменніка Міхаіла Шолахава, лаўрэата Нобелеўскай прэміі. У бэзу ружавата-ліловыя кветкі.

Бэз «Маркіз дэ Кандарсэ»

Гэта старадаўні сорт бэзу, які вывеў вядомы французскі селекцыянер Віктор Лемуан.

Дарэчы, гэты самы модны сорт у гэтым сезоне, паколькі блакітнаватыя тоны – у трэндзе. Сузіраць гэты бэз лепш за ўсё на адлегласці метраў дваццаці, так ён выглядае па-асабліваму, казачна.

Кветкі ў бэзу дробныя, паўмахровыя, светлыя блакітнавата-ліловыя з лёгкім перламутравым адценнем, а вось бутоны – больш насычаныя, сіне-фіялетавыя.

Бэз «Максімовіч»

Гэта бэз французскай селекцыі 1906 года. Сорт назвалі ў гонар выдатнага расійскага батаніка Карла Максімовіча.

Бутоны бэзу буйныя, а пялёсткі могуць быць да трох сантыметраў. Пры гэтым кветкі светла-фіялетавага адцення, а да канца цвіцення могуць выгарэць і стаць светла-бэзавымі.

Бэз «Алімпіяда Калеснікава»

У бэзу фіялетава-пурпурныя бутоны, а кветкі махровыя, лілова-ружовыя, пялёсткі закручаны ў розныя бакі.

Гэты сорт бэзу носіць імя жонкі селекцыянера Леаніда Калеснікава – Алімпіяды Мікалаеўны.

Бэз «Прымроўз»

Гэта адзіны жоўты бэз у свеце – для аматараў калекцыяніраваць рэдкасці. Эфектны і непаўторны сорт бэзу галандскай селекцыі, які ўнікальны мяккім светла-крэмава-жоўтым колерам пялёсткаў.

«Прымроўз» у 1949 годзе вывеў у Нідэрландах селекцыянер Герыт Маарсэ.

Бэз «Лябёдачка»

Беларускі сорт бэзу, які ў 1964 годзе стварылі селекцыянеры Мікалай Смольскі і Вераніка Бібікава.

Кветкі буйныя і беласнежныя. Гэты бэз адрозніваецца багатым цвіценнем, а бутоны – махровасцю.

Бэз «Багдан Хмяльніцкі»

Украінскі сорт бэзу, які вывелі ў 1954 годзе.

Бутоны тут махровыя, пялёсткі буйныя, а кветкі насычанага бэзавага колеру.

Бэз «Сэнсэйшн»

Гэты сорт вельмі папулярны ў садаводаў з-за незвычайнай двухколернай афарбоўкі пялёсткаў: пурпурныя кветкі аблямаваны прыкметнай белай палоскай.

Сорт у 1938 годзе вывеў галандскі селекцыянер Дзірк Эвеленс Маарсэ.

Бэз «Змярканне»

Гэта расійскі сорт бэзу, які ў 1954 годзе стварыў Леанід Калеснікаў.

У бутонаў яркая афарбоўка, а кветкі – цёмна-пурпурныя.

Бэз «Месячнае святло»

Гэта беларускі сорт, які атрымаў назву за жамчужна-белае адценне пялёсткаў.

Сорт вывелі Мікалай Смольскі і Вераніка Бібікава.

Бэз «Зара камунізму»

Сорт аўтарства селекцыянера Леаніда Калеснікава. У бэзу буйныя суквецці, а адценне кветак пачынаецца з пурпурна-чырвонага і пераходзіць у фіялетавы.

Бэз «Багацце»

Гэта сорт савецкай селекцыі сярэдзіны XX стагоддзя.

Бутоны бэзу – ярка-ліловага колеру.

Бэз «Радж Капур»

Гэты сорт у 1955 годзе вывеў Леанід Калеснікаў і назваў у гонар індыйскага акцёра. У тыя гады Радж Капур быў папулярны ў Савецкім Саюзе.

Бэз «Тарас Бульба»

Украінскі сорт бэзу, які вывелі ў 1956 годзе. Пялёсткі кветак тут бэзава-блакітнаватыя.

Бэз «Жорж Жак Дантон»

Сорт у 1911 годзе стварылі ў Францыі. Пялёсткі ў бэзу светла-пурпурнага колеру з інтэнсіўным фіялетавым адлівам.

Бэз «Аўкубафолія»

Гэта ўнікальны сорт бэзу французскай селекцыі, фатаграфіяй якога з рэдакцыяй Times.by падзяліліся чытачы. У беларускіх садах яго пакуль сустрэнеш не часта.

У гэтага бэзу махровыя бутоны, а кветкі светла-блакітнага колеру з лёгкім ліловым адценнем.

Асаблівасць сорту – стракаталістасць. Лісце ў бэзу зялёнае, з залацістымі або крэмава-жоўтымі плямамі і палосамі, як у японскай аўкубы.