«А як інакш?»: Лукашэнка расказаў, якая будучыня ў Беларусі, Расіі і Украіны

Кіраўнік дзяржавы яшчэ раз адзначыў, што няма той сілы, якая магла б разарваць адзінства Мінска і Масквы.

Прэзідэнт Беларусі Аляксандр Лукашэнка расказаў, якім бачыць будучыню Беларусі, Украіны і Расіі. Аб гэтым ён заявіў падчас сустрэчы з Валянцінай Мацвіенка, паведамляе прэс-служба кіраўніка дзяржавы.

Беларускі лідар яшчэ раз адзначыў, што ўзаемаадносіны паміж Беларуссю і Расіяй можна смела назваць брацкімі.

«Расія, Беларусь – гэта, як я кажу, наша агульная Айчына. Не мы з вамі вінаватыя, што тут дзве дзяржавы ўтварыліся. Але гэта вельмі дружалюбныя, брацкія дзяржавы. Думаю, няма той сілы, якая магла б разбурыць гэта адзінства», – заявіў Лукашэнка.

Аляксандр Лукашэнка таксама ўдакладніў, што ёсць жадаючыя разарваць гэтыя сувязі, аднак «гэта немагчыма». Акрамя таго, Прэзідэнт расказаў аб тым, якой бачыць будучыню трох народаў.

«Але я ўпэўнены (і аб гэтым гаварыў нядаўна прадстаўнікам Уладзіміра Зяленскага), што ўсё роўна нашы народы будуць разам. Рана ці позна мы будзем усё роўна разам. А як інакш? Вашы родныя пахаваны ва Украіне. Вы сёння працуеце на карысць не толькі Расіі, але і Беларусі, і не супраць той жа Украіны. Ну як гэта ўсё разарваць? Гэта немагчыма. Нашы людзі там жывуць, заўсёды разам жылі і сябравалі. І будуць сябраваць», – сказаў Аляксандр Лукашэнка.

Кіраўнік дзяржавы дадаў, што з цягам часу «мы галаву сваю ў парадак прывядзём і наладзім нашы адносіны», а таксама адзначыў, што ў гэтым плане можна разлічваць на Беларусь.