Аляксандр Лукашэнка павіншаваў беларусаў з Днём Незалежнасці

Прэзідэнт адзначыў, што сёння краіна ўспамінае подзвіг людзей, які дазволіў жыць на роднай зямлі.

Аляксандр Лукашэнка павіншаваў суайчыннікаў з Днём Незалежнасці. Кіраўнік дзяржавы падкрэсліў, што гэта свята напоўнена шчырай любоўю да Радзімы, гонарам за яе гісторыю і дасягненні.

«Дзень вызвалення беларускай сталіцы ад нямецка-фашысцкіх захопнікаў – 3 ліпеня 1944 года – для нашага народа стаў сімвалам мужнасці, свабоды і патрыятызму», – гаворыцца ў віншаванні.

Лукашэнка адзначыў, што ўся краіна з удзячнасцю ўспамінае ўсіх, чый ратны і працоўны подзвіг абараніў права і магчымасць беларусаў жыць і гадаваць дзяцей на роднай зямлі, упэўнена глядзець у заўтрашні дзень.

Паводле слоў беларускага лідара, кожны грамадзянін адчувае асаблівае пачуццё адказнасці перад памяццю продкаў за развіццё і лёс Айчыны, што ўвасабляецца ў канкрэтных справах і здзяйсненнях, імкненні зрабіць агульны дом утульным і бяспечным.

«Менавіта гэтыя адвечныя каштоўнасці аб'ядноўваюць, дапамагаюць нам разам ісці наперад, з'яўляюцца залогам поспеху і працвітання краіны», – адзначыў Аляксандр Лукашэнка.

Прэзідэнт пажадаў усім моцнага здароўя, дабра і шчасця пад мірным небам незалежнай Беларусі.

У гонар Дня Незалежнасці па ўсёй краіне праходзяць святочныя мерапрыемствы: канцэртныя праграмы, патрыятычныя акцыі, феерверкі.

Times.by склаў агляд галоўных пунктаў прыцяжэння ў рэгіёнах. Самая насычаная праграма ў Мінску.