Аляксандр Лукашэнка прыбыў з афіцыйным візітам у Інданезію

Кіраўніка дзяржавы сустракалі з размахам: танцы, нацыянальны каларыт, рота ганаровай варты і пралёт верталётаў.

Прэзідэнт Беларусі Аляксандр Лукашэнка 1 ліпеня прыбыў з афіцыйным візітам у Рэспубліку Інданезія.

Чакаецца, што па выніках перагавораў будзе падпісаны шэраг міжнародных дакументаў. Галоўны з іх – дарожная карта развіцця ключавых напрамкаў супрацоўніцтва паміж Беларуссю і Інданезіяй на 2026–2030 гады.

Аляксандр Лукашэнка ўжо правёў сустрэчу з членамі ўрада Інданезіі. У ёй удзельнічалі міністр інвестыцый, кіраўнік Інвестыцыйнага каардынацыйнага савета, гендырэктар Суверэннага фонду дабрабыту Інданезіі «Данантара» Росан Перкаса Руслані, міністр сельскай гаспадаркі, кіраўнік Нацыянальнага агенцтва па харчаванні «Бапанас» Аідзі Амран Сулайман, генеральны дырэктар і прэзідэнт-дырэктар дзяржаўнай нафтагазавай карпарацыі «Пертаміна» Сайман Алаізіус Манціры.

«Паважаныя сябры, думаю, вы ўжо многія пытанні да гэтай сустрэчы абмеркавалі. Тым не менш, магчыма, узніклі нейкія пытанні, якія трэба будзе вырашыць без валакіты. Я да гэтага гатовы. Ведаю, што і ў галіне сельскай гаспадаркі, паставак і сумеснай вытворчасці медыцынскіх, ветэрынарных прэпаратаў, прадуктаў харчавання вы абмяркоўвалі тэмы», – сказаў Прэзідэнт у пачатку сустрэчы.

Аляксандр Лукашэнка запрасіў прадстаўнікоў урада і бізнесу Інданезіі ў Беларусь, каб паказаць нашы кампаніі і прадпрыемствы.

«Калі вас нешта зацікавіць, лічыце, што гэта ўсё рэалізуемае. У нас закрытых тэм у супрацоўніцтве з Інданезіяй няма. Наадварот, мы хочам пашыраць наша супрацоўніцтва. Таму давайце будзем дамаўляцца», – заявіў беларускі лідар.

Акрамя таго, Прэзідэнт дадаў, што Беларусь гатова разгледзець любыя прапановы, якія датычацца інвестыцый.

«Узаемна хацелі б, каб без усялякай валакіты і затрымак [вырашаліся пытанні], калі мы будзем ствараць тут прадпрыемствы па сумеснай вытворчасці тавараў, якія вас цікавяць. Магчымы любыя напрамкі супрацоўніцтва. Вы толькі гаварыце, што трэба. Яшчэ раз падкрэсліваю, каб вызначыцца з нашымі магчымасцямі, вы паглядзіце ў Беларусі, на што здольна краіна», – сказаў Прэзідэнт.

Асобна Лукашэнка акцэнтаваў увагу на магчымасцях і тэхналогіях Беларусі.

«Вы добра ведаеце, што нашы магчымасці – гэта перш за ўсё беларускія тэхналогіі, якія каранямі адыходзяць у часы Савецкага Саюза. Таксама ведаеце, што гэта была адна з самых развітых краін свету. Мы гэтыя тэхналогіі захавалі і шмат у чым мадэрнізавалі прадпрыемствы, якія працуюць па гэтых тэхналогіях. І самае галоўнае, я ведаю мэты, да якіх вы імкняцеся. На шляху да гэтых мэт мы можам быць вам карысны з нашымі тэхналогіямі», – дадаў Аляксандр Лукашэнка.