«Белавія» пасля доўгага перапынку аднавіла рэйсы з Мінска ва Уфу

Першых пасажыраў па традыцыі сустрэлі пажарныя машыны, якія арганізавалі непасрэдна на пероне воднае шоу.

Прамыя рэйсы паміж Мінскам і Уфой вярнуліся праз амаль пяць гадоў у расклад беларускай авіякампаніі «Белавія», перадае карэспандэнт Times.by.

Першы борт адправіўся ў сталіцу Башкартастана ў сераду, 24 чэрвеня, у 09:30, а назад у Беларусь самалёт прыляцеў у 16:20. Як таго патрабуе авіяцыйны рытуал, яго сустрэлі водным салютам.

Палёты па маршруце Мінск – Уфа – Мінск будуць выконвацца адзін раз ў тыдзень па серадах на паветраным судне Embraer 195. Але для першага рэйса самалёт быў заменены на больш умяшчальны – Boeing 737 MAX 8. Час у дарозе – 2 гадзіны 50 хвілін.

Уфа стала дзявятым горадам Расіі, куды «Белавія» выконвае рэгулярныя рэйсы. Цяпер самалёты з васільком лятаюць таксама ў Маскву, Санкт-Пецярбург, Калінінград, Екацярынбург, Казань, Махачкалу, Мурманск і Сочы.

Башкірска-беларускае даўгалецце

Аднаўленне прамых рэйсаў паміж сталіцамі Беларусі і Башкартастана стала магчымым у тым ліку дзякуючы турыстычнай праграме «Башкірска-беларускае даўгалецце».

У рамках праекта арганізоўваюцца паездкі жыхароў расійскага рэгіёну ў рэспубліку для адпачынку і аздараўлення ў санаторыях. Паводле даных Рэспубліканскага саюза турыстычнай індустрыі, за тры гады па праграме Беларусь наведалі больш за 3,8 тыс. жыхароў Башкартастана.

Сёння перад маршрутам стаіць новая задача – развіць адваротны турпаток з Беларусі і прыцягнуць бізнес-пасажыраў.