«Белавія» растлумачыла, чаму рэйсаў у Дананг і Тайланд пакуль не будзе

На Пхукет, у Патаю і на Шры-Ланку палётныя праграмы адновяцца ўжо восенню.

На летні час давялося прыпыніць выкананне далёкамагістральных рэйсаў на в’етнамскі курорт Дананг, а таксама на тайскія Пхукет і Патаю, паведаміў намеснік генеральнага дырэктара па маркетынгу і знешнеэканамічнай дзейнасці «Белавія» Уладзімір Баркун.

Палётная праграма з Беларусі на в’етнамскі курорт павінна была стартаваць з 10 мая, але прамыя рэйсы адмянілі «па арганізацыйных прычынах.

Што датычыцца рэйсаў у Тайланд, іх часова паставілі на паўзу.

«Усё гэта якраз звязана з падаражэннем паліва, з тым, што павялічваецца кошт пералёту. Адпаведна, знізіўся попыт. Таму было прынята рашэнне пасля кансультацый з тураператарамі-заказчыкамі, што лепш праграму часова прыпыніць. Але рэйсы ў Тайланд, на Шры-Ланку будуць адноўлены ў кастрычніку. У Дананг рэйсаў пакуль не плануецца», – сказаў Баркун, адказваючы на пытанне Times.by.

У летнім сезоне – 2026 «Белавія» працягне выконваць чартарныя рэйсы ў Турцыю (Анталія, Ізмір і Бодрум) і Егіпет (Шарм-эш-Шэйх, Хургада і Эль-Аламейн). Частка праграм даступная не толькі з Мінска, але і з рэгіянальных аэрапортаў Беларусі. А з 29 мая айчынны перавозчык і тураператар адкрыюць чартарную праграму з Брэста ў Эль-Аламейн – гэта будзе новы напрамак для абласнога цэнтра.