ДАІ арганізуе дзяжурства на вадасховішчах пад Мінскам

На кантролі абласной аўтаінспекцыі – стан кіроўцаў і правілы прыпынку і стаянкі аўтамабіляў.

Сёння і ў бліжэйшыя выхадныя ДАІ Мінскай вобласці пераходзіць на ўзмоцнены рэжым працы. Асаблівая ўвага – да месцаў адпачынку. Інспектары будуць сачыць за станам кіроўцаў і за тым, як аўтамабілі паркуюцца на абочынах.

З прыходам цяпла і сонца мінчане пацягнуліся за горад. Найбольш папулярныя месцы адпачынку – вадасховішчы «Заслаўскае», «Крыніца», «Дразды» і «Пціч».

У абласной Дзяржаўтаінспекцыі адзначаюць: нягледзячы на наяўнасць абсталяваных стаянак, многія кіроўцы пакідаюць транспарт проста на абочынах дарог, прылеглых да пляжаў. Гэта не толькі ўскладняе праезд іншым удзельнікам руху, але і часта суправаджаецца ігнараваннем знака «Рух забаронены».

«Правілы дазваляюць пад’ехаць да прыбярэжнай зоны для пасадкі і высадкі пасажыраў або разгрузкі рэчаў, аднак пасля гэтага аўтамабіль неабходна перамясціць на спецыяльна абсталяваную стаянку, – нагадваюць у ДАІ. – Заклікаем кіроўцаў да дысцыпліны і нагадваем пра недапушчальнасць кіравання транспартам у стане алкагольнага ап’янення».

А сталічная міліцыя 23 мая будзе забяспечваць грамадскі парадак падчас правядзення ўрачыстасцяў, прысвечаных «Апошняму званку». Узмоцненыя нарады будуць дзяжурыць у месцах масавага знаходжання моладзі – на агульнагарадскім свяце ў Мінск-Арэне і падчас цырымоніі ўскладання кветак каля стэлы Мінск – горад-герой.

Дадатковыя патрулі з’явяцца ва ўсіх сталічных парках і скверах. Супрацоўнікі органаў унутраных спраў нацэлены на папярэджанне правапарушэнняў і забеспячэнне бяспекі адпачывальнікаў.