Для ўрачыстых лінеек у школах і гімназіях устанавілі абмежаванні па часе

Заканчэнне навучальнага года адзначаць у школах і гімназіях Беларусі 23 мая.

Апошні званок празвініць ва ўстановах адукацыі для вучняў 11-х класаў – іх у 2026 годзе больш за 58 тыс., а таксама для дзевяцікласнікаў – іх каля 101 тыс.

Міністэрства адукацыі рэкамендавала абмежаваць працягласць правядзення ўрачыстых мерапрыемстваў: не больш за 45 хвілін, з улікам умоў надвор’я і месца правядзення, каб выключыць пазаштатныя сітуацыі, паведаміў намеснік начальніка галоўнага ўпраўлення ідэалагічнай, выхаваўчай работы і маладзёжнай палітыкі – начальнік упраўлення выхаваўчай і сацыяльнай работы Міністэрства адукацыі Аляксандр Мацюшонак.

«Таксама сёлета вырашана не праводзіць рэспубліканскае свята «Апошні званок» у сувязі са шчыльным графікам цэнтралізаванага экзамену і цэнтралізаванага тэсціравання», – растлумачыў прадстаўнік ведамства.

У сталіцы ўрачыстыя лінейкі пачнуцца ў 10:00. Затым выпускнікі гімназій і школ ускладуць кветкі да стэлы «Мінск – горад-герой» у 12:30. Працягам свята стане канцэрт у «Мінск-Арэне».

«Запланаваны выступленні як творчых калектываў і артыстаў, так і саміх вучняў, якія падрыхтавалі творчыя нумары сумесна з педагогамі. Пачатак у 17:00», – расказала начальнік аддзела выхаваўчай і ідэалагічнай работы камітэта па адукацыі Мінгарвыканкама Ганна Рысявец.

Спецыяліст падкрэсліла: гарадскі пасажырскі транспарт павялічыць колькасць рухомага саставу, каб выпускнікі змаглі своечасова дабрацца як да «Мінск-Арэны», так і дадому пасля заканчэння свята.

Ганна Рысявец удакладніла, што сёлета ў Мінску больш за 13 тыс. выпускнікоў 11-х класаў і звыш 29 тыс. – 9-х класаў.