Галоўчанка: тэмпы інфляцыі ў Беларусі запавольваюцца

Адразу на старце сустрэчы ў Нясвіжскім замку Раман Галоўчанка абазначыў: абмяркоўваць будзем не абстрактныя тэмы, а канкрэтныя актуальныя выклікі, якія дыктуе рэальнасць.

«Лічбавыя валюты, кібербяспека, віртуальныя актывы – сёння гэта не проста тэхналагічныя трэнды, гэта фундаментальная апoра, на якой будуецца лічбавы і фінансавы суверэнітэт краін. Наша задача – узяць у гэтых пытаннях ініцыятыву ў свае рукі і задаваць рытм, якога будуць прытрымлівацца астатнія», – абазначыў кіраўнік Нацбанка, падкрэсліўшы, што для фарміравання агульнага фінансавага рынку краінам ЕАЭС трэба дзейнічаць актыўней.

Галоўчанка канстатаваў, што ў гэтым напрамку ўжо зроблены пэўныя крокі: распрацаваны праект пагаднення аб стандартызаванай ліцэнзіі ў банкаўскім і страхавым сектарах, створана прававая аснова для ўзаемнага допуску прафудзельнікаў рынку каштоўных папер да арганізаваных таргоў на біржах краін ЕАЭС.

Аднак на пасяджэнні былі дакладна абазначаны і негатыўныя моманты. Да супярэчнасцей, якія патрабуюць узгодненых рашэнняў, Раман Галоўчанка аднёс развіццё лічбавых фінансавых актываў (цяпер іх рэгуляванне адбываецца па розных правілах), а таксама «адсутнасць узгодненых падыходаў да класіфікацыі лічбавых актываў, патрабаванні да эмітэнтаў і трансгранічнага абарачэння ствараюць рызыкі рэгулятарнага арбітражу і абмяжоўваюць патэнцыял рынку». Пры гэтым кіраўнік Нацбанка акцэнтаваў увагу, што гатоўнасць «да выпрацоўкі ўзгодненых рашэнняў, якія зробяць фінансавую сістэму ЕАЭС больш устойлівай, зручнай для грамадзян і бізнесу» ёсць.   З бясспрэчна пазітыўных момантаў узаемадзеяння Раман Галоўчанка назваў стабільны рост долі разлікаў у нацыянальных валютах паміж краінамі ЕАЭС – цяпер яна складае 93,5%.

«Рыначныя механізмы самі стымулююць пераход на нацыянальныя валюты. Бізнес выбірае надзейныя і прадказальныя інструменты без неабходнасці адміністрацыйнага прымушэння. Для нашых краін важна пашыраць разлікі ў нацыянальных валютах – гэта зніжае транзакцыйныя выдаткі і валютныя рызыкі», – растлумачыў Раман Галоўчанка.

Нагадаў ён і аб знешніх выкліках і пагрозах, якія сур'ёзна паўплывалі на ўзаемадзеянне краін у ЕАЭС.

«Аб'ём узаемнага гандлю за восем месяцаў склаў $67,6 млрд, у параўнанні з аналагічным перыядам мінулага года павялічыўся на 11,5%. Паводле прагнозных ацэнак, у бягучым годзе вартасны аб'ём узаемнага гандлю складзе каля $106 млрд з ростам на 10%. Такая дынаміка ўзаемнага гандлю пацвярджае ўстойлівасць эканомік нашых краін, у тым ліку да знешняга націску, і запатрабаванасць інтэграцыйных сувязей», – адзначыў Раман Галоўчанка.

Адказваючы на пытанні журналістаў па выніках пасяджэння, Галоўчанка расказаў аб сітуацыі з інфляцыяй у краінах ЕАЭС.

«Дынаміка рознанакіраваная. У Беларусі і Казахстане назіраецца запаволенне тэмпаў інфляцыі ў параўнанні з мінулым годам, а ў Арменіі, Расіі, Кыргызстане яна крыху ўзмацнілася. Тым не менш усе працэсы застаюцца пад кантролем. Мы сёння абмеркавалі тыя меры, якія прымаюць рэгулятары, паколькі гэта пытанне ўплывае не толькі на сітуацыю ў кожнай з дзяржаў ЕАЭС, але і пэўным чынам на эканомікі асноўных гандлёвых партнёраў», – растлумачыў кіраўнік Нацбанка.