Хірургаў і пацыента раздзялялі 6 тыс. км: у Мінску правялі ўнікальную аперацыю

Урачы ў Мінску выдалілі частку печані хвораму ў Кітаі з дапамогай новых тэхналогій, хутка так будуць аперыраваць у рэгіёнах Беларусі.

Рабатызаванае аператыўнае ўмяшанне па рэзекцыі долі печані правялі на адлегласці 6 тыс. км у аперацыйнай МНПЦ хірургіі, транспланталогіі і гематалогіі. Хірургі знаходзіліся ў Мінску і дыстанцыйна кіравалі інструментамі ўнутры цела пацыента ў Кітаі.

У мінскай аперацыйнай працавалі айчынныя спецыялісты разам з калегамі з Паднябеснай. Яны выкарыстоўвалі рабатызаваны комплекс, падключаны праз абароненую міжнародную сетку з высокай прапускной здольнасцю.

Паводле слоў дырэктара МНПЦ, доктара медыцынскіх навук, прафесара, акадэміка НАН Алега Румо, гэта першы крок у асваенні анлайн-тэхналогій для аператыўных умяшанняў. Ключавую ролю адыгралі якаснае абсталяванне і вывераная тэлекамунікацыйная інфраструктура, якая забяспечвае стабільную перадачу даных у рэальным часе.

Такія аперацыі плануюць развіваць па ўсёй Беларусі: хірургі будуць знаходзіцца ў сталічным цэнтры, а пацыенты – у рэгіянальных аперацыйных, дзе ўсталяваны падобныя робаты. У бліжэйшы час пройдзе сумесная аперацыя з Мінскай абласной клінічнай бальніцай.

«Мы ўпэўнены ў тым, што каманды на месцах кваліфікаваныя і ў выпадку пазаштатных сітуацый яны ўмяшаюцца. Пры гэтым кантроль за якасцю аперацый, выкананне самых складаных этапаў будзе тут, у Мінску, на базе нашага цэнтра. Выкарыстоўваючы гэтыя тэхналогіі, мы плануем праводзіць навучанне ў рэгіёнах Беларусі, пашыраючы такім чынам магчымасці нашых міжраённых і абласных хірургічных цэнтраў», – падзяліўся планамі Румо.