Інфляцыя ў верасні склала 0,5%

Менш за ўсё ў мінулым месяцы падаражэлі харчовыя тавары.

Дадаць у асноўныя
крыніцы Google

Цэны на тавары і паслугі ў верасні выраслі на 0,5% у параўнанні са жніўнем, паведамляе Белстат.

Прадукты харчавання падаражэлі ў сярэднім на 0,1% за апошні месяц, а нехарчовыя тавары – на 0,6%. На 0,9% выраслі цэны на паслугі.

У параўнанні са снежнем 2025 года інфляцыя склала 3,6%, а ў гадавым выражэнні (да верасня 2025-га) – 4,6%.

Нагадаем, паводле прагнозаў улад, інфляцыя на канец года не павінна перавысіць 7%.

Што падаражэла, а што патаннела ў верасні

Times.by зрабіў параўнальны аналіз сярэдніх цэн на спажывецкія тавары, якія штомесяц публікуе Белстат. Размова ідзе аб таварах, якія рэалізуюцца ў рознічнай сетцы краіны – у магазінах і на гарадскіх рынках.

У верасні патаннелі рыс, манныя крупы, аўсянка, прасяная каша, кукурузныя шматкі, гарох, фасоля, хлеб жытні, шакалад, сала, тварог, сыр мяккі, цвёрды і паўцвёрды, масла сметанковае, яблыкі, вінаград, грушы і ўвесь баршчавы набор – бульба, цыбуля, капуста, буракі, морква.

Свежыя агуркі і памідоры падаражэлі – сезон скончыўся. Таксама выраслі ў цане грэчка, мука, мармелад, ялавічына, свініна, курыца, пельмені, вараная і сыравэнджаныя каўбасы, рыба жывая і марожаная, кефір, смятана, яйкі.

З нехарчовых тавараў падаражэла некаторае адзенне: джынсы, паліто, курткі, шкарпэткі, блузка. У той жа час патаннелі асобныя будаўнічыя матэрыялы – ламінат, цэмент, керамічная плітка. Больш чым на BYN 1000 патаннелі легкавыя аўтамабілі.