Кіраўнік Мінінфарма Жук назваў умову блакіроўкі YouTube ў Беларусі

З пачатку красавіка відэаплатформа без папярэджання выдаліла ўсе акаўнты буйнейшых дзяржаўных СМІ.

Блакіроўка відэахостынгу YouTube ў Беларусі можа здарыцца толькі пры ўмове пагрозы нацыянальнай бяспецы, заявіў міністр інфармацыі Дзмітрый Жук падчас пленарнага пасяджэння VI Форуму медыйнай супольнасці Беларусі «Медыяасяроддзе сёння: сэнсы або «белы шум» у Гродне.

Раней амерыканская відэаплатформа заблакіравала і выдаліла каналы беларускіх дзяржаўных СМІ, у тым ліку БелТА, АНТ, СТБ і радыё «Беларусь».

«Сысці з пляцоўкі, на якой знаходзяцца нашы з вамі грамадзяне, напэўна, так сабе гісторыя. Яшчэ раз паўтару тое, што ўжо гаварыў, – толькі ў выпадку пагрозы нацыянальнай бяспецы», – прыводзіць словы Дзмітрыя Жука БелТА.

Паводле слоў кіраўніка Міністэрства інфармацыі, заўсёды павінен быць запасны план. «Мы не маем права складваць усе нашы прадукты ў адзін кошык. Тым больш калі гэты кошык у чужых руках. Разаб’юць абавязкова», – сказаў Дзмітрый Жук.

«У нас ёсць вопыт, ёсць Videobel – вельмі добрая платформа. Яна адразу пачне набіраць папулярнасць, як толькі знікнуць іншыя відэахостынгі, – адзначыў Дзмітрый Жук. – Трэба выкарыстоўваць усе існуючыя рэсурсы».

Раней кіраўнік Міністэрства інфармацыі, каменціруючы магчымасць забароны ў краіне платформы на фоне выдалення каналаў вядучых айчынных СМІ, заявіў, што ў гэтым пытанні трэба дзейнічаць асцярожна. Паводле слоў Дзмітрыя Жука, неабходна шукаць іншыя механізмы ўзаемаадносін з ігракамі сусветнай медыяпрасторы.