Кодэкс аб ахове здароўя распрацоўваюць у Беларусі

У дакуменце плануюць улічыць новыя арганізацыйныя формы: прыватную ахову здароўя, страхавую медыцыну.

У Палаце прадстаўнікоў рыхтуюцца да разгляду Кодэкса аб ахове здароўя, расказаў у эфіры «РТР-Беларусь» старшыня Пастаяннай камісіі па ахове здароўя, фізічнай культуры, сямейнай і маладзёжнай палітыцы Валерый Малашка.

Паводле яго слоў, непасрэдна цяпер у парламенце знаходзіцца закон «Аб фізічнай культуры і спорце». З 1 студзеня турызм перададзены ў распараджэнне ўрада, такім чынам, змяніліся кіраўніцкія падыходы. У тым ліку на Усебеларускім народным сходзе перад турыстычнай сферай пастаўлены сур’ёзныя задачы.

«Мы з нецярпеннем чакаем прыходу Кодэкса аб ахове здароўя ў парламент. Для мяне гэта высокі гонар – апынуцца ў гэты час у гэтым месцы, таму што фарміруецца новы ўнікальны дакумент, па якім будзе працаваць цэлая галіна», – падкрэсліў Валерый Малашка.

Гэта першы кодэкс у сферы аховы здароўя. Для параўнання: у Кодэкс аб адукацыі ўжо тройчы ўносілі змяненні. Тут жа парламентарыі працуюць з нуля.

Як сказаў парламентарый, дакумент павінен не проста замацаваць прававыя нормы, а стаць драйверам развіцця сістэмы. У прыватнасці, будуць улічаны новыя арганізацыйныя формы: прыватная ахова здароўя, страхавая медыцына, адзначыў Валерый Малашка.