Лукашэнка акрэсліў праблемныя пытанні ў рабоце ЕАЭС

Беларускія ўлады паслядоўна выступаюць за пашырэнне прамысловай кааперацыі ўнутры аб’яднання і зняцце гандлёвых бар’ераў.

Прэзідэнт Беларусі Аляксандр Лукашэнка падчас пасяджэння Вышэйшага Еўразійскага эканамічнага савета заклікаў як мага хутчэй рэалізаваць усе пастаўленыя перад ЕАЭС мэты і задачы.

«Не папракаю, а настойліва заклікаю: раз ужо мы 12 гадоў таму пагадзіліся ісці да глыбокай эканамічнай інтэграцыі, давайце ўсе мэты і задачы саюза ўвасабляць у жыццё своечасова і ў поўным аб’ёме», – заявіў беларускі лідар.

Паводле яго слоў, дэкларацыя аб развіцці інтэграцыі «Еўразійскі эканамічны шлях» павінна рэалізоўвацца без пераносаў і спасылак на нейкія аб’ектыўныя прычыны, таму што ЕАЭС ствараўся для пераадолення рызык.

Утылізацыйны збор

Кіраўнік беларускай дзяржавы нагадаў, што на пачатку еўразійскай інтэграцыі падымалася пытанне аб інвестыцыях ва ўласную вытворчасць базы аўтакампанентаў.

«А цяпер што адбылося? Кожны закрыўся так, што мыш не праскочыць. Стаўкі ўтылізацыйных збораў хутка перавысяць кошт саміх машын», – канстатаваў ён.

Лукашэнка ў сувязі з гэтым адзначыў, што сітуацыя патрабуе выпраўлення, але рэалізацыя прамысловай палітыкі ў ЕАЭС у гэтай галіне кульгае.

«Механізм стымулявання кааперацыі запушчаны, але маштаб і эфект пакуль нязначныя. Не можам знайсці дастойныя саюзныя праекты. Адначасова ствараем дубліруючыя вытворчасці, а потым іх адзін ад аднаго ўсімі сіламі абараняем», – сказаў ён.

Рэалізацыя ідэй ЕАЭС

Прэзідэнт заклікаў сваіх калег зрабіць рашучыя крокі ў бок рэалізацыі асноўных ідэй еўразійскай інтэграцыі.

«Трэба рабіць эфектыўным наш саюз. Для гэтага мы павінны яшчэ раз прарэвізаваць нашу работу і адмовіцца ад таго, што перашкаджае працаваць», – акцэнтаваў ён увагу.

Лукашэнка папярэдзіў, што, калі нічога не зрабіць для выпраўлення сітуацыі, «ператворымся ў празасядалых, як Маякоўскі гаварыў».

На яго думку, неабходна павышаць эфектыўнасць работы ЕАЭС, інакш у адваротным выпадку еўразійская інтэграцыя страціць сваю прывабнасць.

«І калі нават хтосьці паназірае за работай, а потым стане членам Еўразійскага эканамічнага саюза, хутка расчаруецца ў эфектыўнасці яго дзейнасці», – дадаў беларускі лідар.