Лукашэнка і Пуцін звязаліся па ВКС у ходзе трэніроўкі прымянення ядзернай зброі

Беларускія і расійскія вайскоўцы сумесна адпрацоўваюць пытанні баявога прымянення спецыяльнай зброі.

Прэзідэнт Беларусі Аляксандр Лукашэнка сазваніўся па відэа-канферэнц-сувязі са сваім расійскім калегам Уладзімірам Пуціным падчас правядзення сумеснай трэніроўкі часцей баявога прымянення ядзернай зброі і ядзернага забеспячэння.

«Сапраўды, гэта першая такая сумесная трэніроўка. Але па элементах, па складніках, аказваецца, нашы генеральныя штабы, міністры абароны праводзяць яе штоквартальна. Але без нас, мы з вамі яшчэ зімой абмяркоўвалі перспектыву ўдзелу прэзідэнтаў», – цытуе Лукашэнку БелТА.

Паводле яго слоў, Беларусь і РФ нікому не пагражаюць, але, паколькі ў іх ёсць ядзерная зброя, ёй трэба ўмець карыстацца. Гэта неабходна для абароны дзяржавы.

Прэзідэнт Беларусі расказаў Пуціну, што вывучыў усе ваенныя аб’екты ў рэспубліцы – яны ў добрым стане. Расійскія генералы станоўча ацэньваюць сумесную работу з беларускімі калегамі.

«Думаю, што запланаваныя мерапрыемствы пройдуць нармальна. Зразумела, той, хто нешта хоча ўбачыць у гэтым, той убачыць. Але гэта наша справа, мы займаемся законнай справай і будзем гэтым займацца, абараняючы жыццё нашых людзей», – падкрэсліў Лукашэнка.

Беларускі лідар выйшаў на сувязь з Пуціным з пункта кіравання Міністэрства абароны пасля таго, як заслухаў даклад аб ходзе трэніроўкі.

Раней Times.by пісаў, што Лукашэнку прадэманстравалі ракетны комплекс «Іскандэр-М», здольны прымяняць спецыяльныя боепрыпасы, і ўмоўнае нанясенне ракетнага ядзернага ўдару.