Лукашэнка паставіў задачу мінскаму «Дынама» на наступны сезон: трэба браць Кубак

Кіраўнік дзяржавы назваў сталічны хакейны клуб важным ідэалагічным праектам, які трэба развіваць.

Прэзідэнт Беларусі Аляксандр Лукашэнка паставіў задачу хакеістам мінскага «Дынама» на наступны сезон КХЛ, піша БелТА.

У аўторак у Палацы Незалежнасці праходзіць нарада аб развіцці хакея ў рэспубліцы.

«Давайце адкрыта гаварыць – гэта [ХК «Дынама-Мінск»] такі важны ідэалагічны праект у нашай краіне. Народная каманда, як яе вызначылі. Гэта галоўны ідэалагічны праект», – заявіў Прэзідэнт.

Аляксандр Лукашэнка падкрэсліў, што трэба развіваць гэты важны праект. Пры гэтым ён заўважыў, што прагрэс у «зуброў» ёсць – гэтага ніхто не аспрэчвае.

«Тое, што каманда не дасягнула таго, што павінна была дасягнуць і што абяцалі, гэта факт», – сказаў кіраўнік дзяржавы.

Паводле слоў Прэзідэнта, неабходна рухацца далей і пад гэты рух падбіраць людзей. Але ў гэтым працэсе, упэўнены Прэзідэнт, важна не страціць тое, што ўжо ёсць.

«Нацэленасць адна: у чвэрцьфінал [Кантынентальнай хакейнай лігі] трапілі, заўтра [у наступным сезоне] трэба Кубак браць», – адзначыў Прэзідэнт.

Нагадаем, у мінулым сезоне мінчане ўпершыню ў сваёй гісторыі занялі пятае месца ў КХЛ. Каманда дайшла да чвэрцьфіналу, дзе ўступіла казанскаму «Ак Барсу».

Новы сезон КХЛ стартуе 5 верасня. «Зубры» першы матч правядуць на «Мінск-Арэне» 7 верасня супраць ніжагародскага «Тарпеда».