Лукашэнка павіншаваў Трампа з 250-годдзем утварэння ЗША

Кіраўнік дзяржавы заявіў, што гатовы працаваць разам з калегам з ЗША для нармалізацыі беларуска-амерыканскіх адносін.

Прэзідэнт Беларусі Аляксандр Лукашэнка павіншаваў свайго амерыканскага калегу Дональда Трампа з Днём незалежнасці ЗША і 250-годдзем утварэння краіны, паведаміла прэс-служба беларускага лідара.

У віншавальнай тэлеграме кіраўнік дзяржавы адзначыў, што за гэты час амерыканская нацыя дасягнула выдатных поспехаў, назіраць за якімі «немагчыма без захаплення».

«Высадка на Месяц, значныя для ўсяго чалавецтва прарывы ў сферах навукі і медыцыны, сур'ёзныя эканамічныя дасягненні – усё гэта прыклады мэтанакіраванасці, працавітасці і сапраўднага патрыятызму амерыканцаў», – гаворыцца ў тэксце віншавання.

Лукашэнка звярнуў увагу на тое, што 250-годдзе ўтварэння Злучаных Штатаў Амерыкі выпадае на перыяд прэзідэнцтва чалавека, які прыкладае ўсе намаганні на карысць сваёй краіны, – і гэта невыпадкова.

Паводле слоў Прэзідэнта, паміж народамі Беларусі і ЗША ніколі не было супярэчнасцей. У сувязі з гэтым ён заявіў, што гатовы працаваць разам са сваім амерыканскім калегам для нармалізацыі адносін Мінска і Вашынгтона.

Акрамя таго, Лукашэнка таксама мае намер падтрымліваць імкненні Трампа «зрабіць планету больш бяспечным месцам для нашых дзяцей і ўнукаў», адзначаецца ў тэлеграме.

Беларускі лідар пажадаў кіраўніку ЗША і кожнаму амерыканцу міру, шчасця і працвітання.

Злучаныя Штаты Амерыкі былі ўтвораны 4 ліпеня 1776 года. У гэты дзень 13 брытанскіх калоній абвясцілі аб сваёй незалежнасці.

Магчымая сустрэча з Трампам

У чэрвені Лукашэнка заявіў у інтэрв'ю тэлеканалу «Аль-Арабія», што ён не выключае магчымасці сустрэчы з Трампам. Прэзідэнт нагадаў, што ён атрымаў запрашэнне на маючы адбыцца восенню Саміт міру.

Паводле слоў кіраўніка дзяржавы, дамоўленасці паміж Беларуссю і Штатамі не будуць мець глабальнага характару – гэта відавочна. Але яны, падкрэсліў Лукашэнка, дазволяць развязаць вузлы паміж дзвюма краінамі, «каб зрабіць так, каб палепшыць нашы адносіны».