Лукашэнка сказаў, без чаго немагчыма вырашаць абаронныя задачы

Беларуская армія ў апошнія гады істотна нарасціла пастаўкі сучасных відаў узбраення і тэхнікі ў войскі.

Прэзідэнт Беларусі Аляксандр Лукашэнка правёў сёння нараду па пытаннях дзяржпраграм узбраення і дзяржабаронзаказу.

«Без аснашчэння войскаў сучасным узбраеннем вырашаць задачы абароны немагчыма. Пры гэтым хачу заўважыць, мы не павінны кідацца на ўсе віды ўзбраенняў, якія мы бачым у сучасных канфліктах, або вы недзе ў часопісе прачыталі, або вам нехта сказаў», – цытуе кіраўніка дзяржавы Telegram-канал «Пул Першага».

Аляксандр Лукашэнка лічыць, што ў беларускай арміі павінна стаяць на ўзбраенні зброя, з якой умеюць абыходзіцца ў першую чаргу афіцэры. Таксама неабходна ўлічваць спецыфіку беларускай тэрыторыі, якая адрозніваецца сваімі прыроднымі ўмовамі ад пустыні ці ўкраінскіх стэпаў.

«Таму зброю трэба набываць, ствараць тую, якая нам патрэбна будзе. Але пры гэтым яшчэ раз паўтару – без фундаментальнай зброі, якой павінен валодаць салдат, мы ніякую вайну не выйграем», – асабліва адзначыў ён.

Паводле слоў Прэзідэнта, падчас рэалізацыі папярэдняй праграмы стаўку рабілі на ўмацаванне ваенна-паветраных сіл і войскаў ППА.

Ваенныя атрымалі новыя самалёты, верталёты і сродкі ППА. Для павышэння мабільнасці ў войскі пастаўлялі сучасныя бронемашыны, у тым ліку беларускія. Ваеннаслужачыя атрымалі палепшаную экіпіроўку.

«Важна, што выкананне праграмы дазволіла нам за 5 гадоў павысіць удзельную вагу сучасных узораў ва Узброеных Сілах амаль да паловы – 45%. А доля штогод абнаўляемых павялічвалася да 2%», – канстатаваў кіраўнік дзяржавы.

Аляксандр Лукашэнка выказаў упэўненасць, што работа, якая праводзіцца, дазваляе падтрымліваць узбраенне і тэхніку ў боегатоўнасці.