Лукашэнка ўсклаў вянок да манумента Перамогі ў Мінску

Кіраўнік дзяржавы па традыцыі прыняў удзел у цырымоніі разам з сынамі.

Дзень Перамогі – гэта дзень нацыянальнага гонару, заявіў у суботу Прэзідэнт Беларусі Аляксандр Лукашэнка.

Выступаючы з урачыстай прамовай каля манумента Перамогі, беларускі лідар нагадаў, якую страшную цану заплаціў савецкі народ у Вялікай Айчыннай вайне.

«Больш за 30 мільёнаў загінулых, каля 3 мільёнаў сірот, 25 мільёнаў чалавек, пазбаўленых роднага дома. Дзве тысячы разбураных гарадоў і больш за 70 тысяч знішчаных сёл, вёсак. І мільёны зламаных жыццяў», – адзначыў кіраўнік дзяржавы.

Паводле яго слоў, крымінальная справа аб генацыдзе беларускага народа дабаўляе да лічбаў страт новыя даныя.

«Плюс 47 карных аперацый, пра якія мы не ведалі. Плюс 166 месцаў знішчэння і пахавання. На карце спаленых вёсак ужо 13 тысяч адрасоў. Трыста населеных пунктаў падзялілі трагічны лёс Хатыні. Загінуў кожны трэці», – канстатаваў Лукашэнка.

Народ-пераможца

Прэзідэнт падкрэсліў: сцяг Перамогі сёння ў нашых руках. Перадаючы яго з пакалення ў пакаленне, беларусы абараняюць праўду аб той вайне, адстойваюць статус пераможцаў і суверэннае права выбіраць свой шлях на сваёй зямлі.

«Беларусы, як ніхто, ведаюць, наколькі хутка лозунгі аб «новым парадку» ператвараюцца ў шыбеніцы, лагеры, папялішчы і безыменныя равы. І няхай у фашызму цяпер іншае аблічча, заглянцаванае, гэта сутнасці не мяняе. Мы бачым гэта аблічча. Ідэі звышдзяржаўнасці, уласнага панавання мацнеюць і наносяць свету новыя раны. Але ўжо побач з нашымі граніцамі», – звярнуў увагу беларускі лідар.

Лукашэнка ўказаў на тое, што цяперашні наш вораг – гэта прамыя ідэйныя нашчадкі эсэсаўцаў, бандэраўцаў і «лясных братоў». Тыя, хто якраз цяпер устараняе астанкі савецкіх салдат з літоўскага Шаўляя і называе подзвіг савецкага народа «міфам».

«Тыя, хто метадычна выкрэслівае перамогу Чырвонай арміі з гісторыі Другой сусветнай вайны і не пускае нас да месцаў пахавання дзядоў і прадзедаў», – дадаў ён.

Дзень нацыянальнага гонару

Кіраўнік дзяржавы заявіў: Дзень Перамогі – гэта дзень нацыянальнага гонару. Беларусы помняць салдат і афіцэраў, партызан і падпольшчыкаў, жанчын, узяўшых у рукі зброю.

«Ганарымся ўсімі, хто пасля Перамогі адраджаў Беларусь з руін, адбудоўваючы гарады, аднаўляючы народную гаспадарку. Дзень Перамогі – гэта дзень братэрскага адзінства народаў! Свята, якое нагадвае, наколькі мы моцныя, калі разам. Нам, нашчадкам пераможцаў, нельга забыць, хто мы, калі хочам жыць у міры і бяспецы. І калі мы не хочам вайны», – сказаў на заканчэнне ён.