Лукашэнка заявіў, што думае пра адно: як захаваць Беларусь

Улады рэспублікі прыкладаюць усе намаганні, каб ва ўмовах няпростай знешнепалітычнай абстаноўкі ў краіне захоўвалася спакойная атмасфера.

Прэзідэнт Беларусі Аляксандр Лукашэнка падчас цырымоніі адкрыцця новай бальніцы ў Гродне заявіў, што трэба зберагчы ўсё, што было створана ў краіне за гэтыя гады.

«Я хачу, каб будаўнікі будавалі, а не трымалі кулямёт або аўтамат у руках. Таму не верце нікому, што мы хочам нейкай вайны», – цытуе кіраўніка дзяржавы БелТА.

Паводле яго слоў, вакол рэспублікі складваецца складаная і напружаная абстаноўка, але ўнутры краіны ўдаецца захоўваць мір і спакой.

«Я гляджу і думаю пра адно: як гэта ўсё захаваць», – прызнаўся Лукашэнка.

Кіраўнік дзяржавы звярнуў увагу, што азнаёміўся са справаздачамі разведкі, дзе гаворыцца пра дзеянні беларускай апазіцыі за мяжой.

«Цытата даслоўна – заявіла ўкраінцам: «У нас ёсць, што вам прапанаваць – гэта нашы беларусы». Значыць, мы што, павінны пайсці за чужую волю ваяваць ва Украіну? Мы што, хочам мясным фаршам там быць, як ваенныя кажуць? Не. Мы гэтага не хочам», – канстатаваў Лукашэнка.

На яго думку, беларусам трэба захаваць сваю краіну і ўсё, што было створана за апошнія дзесяцігоддзі. Гэта асабліва зразумела даросламу пакаленню, якое хацела б бачыць, як іх дзеці і ўнукі жывуць на сваёй зямлі.

«Так, хапае ў нас недахопаў, але мы адрозніваемся тым, што мы гэтыя недахопы бачым, у многім іх выкараняем і мы хочам вырашыць усе праблемы, якія ў нас ёсць», – запэўніў кіраўнік дзяржавы.