Малпы любяць гарбату, а лемуры – яблычнае павідла: чым балуюць насельнікаў Гродзенскага заапарка

Сакрэты кармакухні

На кармакухні работа кіпіць з самай раніцы: да 10 гадзін ежа павінна быць гатова і дастаўлена па секцыях. Працэсам кіруе кіраўнік аддзялення кармлення Алена Каверская. Яна працуе ў заапарку з 1999 года і ведае пра густы насельнікаў практычна ўсё.

На кухні – вялікія пліты з умяшчальнымі каструлямі і спецыяльны камбайн для драбнення і нарэзкі агародніны. Штодзённа тут вараць розныя кашы.

У сярэднім за суткі расходуецца 10 кг кукурузы, па 7 кг гароху, аўсянкі, па 4 кг ячных круп і проса, часам дабаўляюцца манныя крупы. А вось рысу патрабуецца не больш за 50 г, ён прызначаны толькі для дробных птушак.

Кашы з апетытам ядуць многія: ад мядзведзяў і малпаў да грызуноў і вадаплаўных птушак.

«Дзякуючы багатаму ўраджаю яблыкаў у гэтым сезоне часцей варым падапечным свежы кампот, балуем і кісялём. Вельмі любяць такія напіткі малпы, – расказвае Алена Каверская. – Яблыкамі дзеляцца з намі неабыякавыя гараджане. Прывозяць лішкі, якія сабралі ў сябе на дачы, за што ім вялікі дзякуй ад нашых жывёл».

Сытныя «мяшанкі» і вітаміны

З надыходам халадоў рацыён насельнікаў мяняецца не істотна. Калі сакавітай травы ўжо няма, капытным пачынаюць даваць пажыўныя агароднінныя «мяшанкі» са здробленых буракоў, морквы і бульбы.

Для в'етнамскіх свінак, трусоў і насельнікаў птушніка адварваюць бульбу – за суткі патрабуецца не менш за 30 кг, морквы і буракоў – па 7 кг.

Для буйных драпежнікаў – тыграў, ільвоў і леапардаў – зімой спецыяльна прарошчваюць злакі як дадатковую крыніцу вітамінаў. У халодную пару порцыі драпежнікаў павялічваюць. Напрыклад, тыгру даюць на 2 кг больш мяса ў дзень: калі летам у рацыёне 8–10 кг, то зімой – каля 11–12 кг. Раз у тыдзень робяць рыбны дзень – у тым жа аб'ёме.

Напярэдадні зімы рацыён становіцца багацейшым у мядзведзяў і вожыкаў, якія рыхтуюцца да спячкі. Касалапыя ўжо перайшлі да актыўнай зажыроўцы і цяпер налягаюць на яблыкі, запасаючыся вітамінамі.

Праўда, у заапарку мядзведзі спяць не так моцна, як у дзікай прыродзе. Зімой яны перыядычна прачынаюцца і атрымліваюць ад работнікаў любімыя ласункі – фрукты і яблычнае павідла.

Ёсць і зімовая нарыхтоўка для капытных – кармавыя венікі. Іх вяжуць з галін вярбы, дубу і бярозы. Зрэшты, такому частаванню рады не толькі алені і ламы, але таксама птушкі і трусы.

Вытанчаныя схільнасці гадаванцаў

Меню насельнікаў заапарка здольна здзівіць. Цікавымі дэталямі падзялілася з Times.by экскурсавод установы Ілона Мікалайчык.

Малпы рэгулярна п'юць чорную гарбату без цукру і вельмі любяць рэпчатую цыбулю. З-за сакавітасці яна прыцягвае іх нават больш, чым спелыя бананы.

А вось дзікабразы вельмі любяць аўсянае пячэнне, але выдаецца яно патроху.

Мядзведзі, малпы і лемуры ў захапленні ад яблычнага павідла. Работнікі змазваюць ім асноўны корм або намазваюць гэты ласунак на белы хлеб.

Расамаха вельмі любіць натуральны мёд. Гэты звер упершыню з'явіўся ў заапарку каля года таму. Спецыялістам давялося доўга падстройваць пад яго меню, і цяга да салодкага стала нечаканасцю.

Універсальнай знаходкай для заапарка стаў тварог. Яго з задавальненнем ядуць розныя насельнікі: ад папугаяў, малпаў і іншых птушак да мядзведзяў, ільвоў і той жа расамахі.

Хлеб, малако і заморскія фрукты

Не абыходзіцца меню і без звычайных для чалавека прадуктаў. Так, у рацыён насельнікаў заапарка ўключаюць белы і жытні хлеб. У дзень патрабуецца не менш за 16 буханак белага і 34 – жытняга. Напрыклад, 7 мядзведзяў за дзень з'ядаюць 13 буханак.

Акрамя таго, мядзведзям, насельнікам акварыума і падапечным веткорпуса рэгулярна выдаюць малако, а сутачны расход курыных яек у заапарку дасягае каля 80 штук. Сырыя яйкі любяць вялікія кошкі, адварныя ідуць для папугаяў.

Фруктова-ягаднае меню таксама разнастайнае і мяняецца па сезонах. Калі бананы даступныя круглы год, то ў жніўні і верасні мядзведзі і капытныя з задавальненнем ласуюцца кавунамі, а лісы маюць асаблівую цягу да ківі.

Папугаяў, малпаў і лемураў часам балуюць вінаградам і гранатамі.

Як адзначае Ілона Мікалайчык, гастранамічныя звычкі жывёл выклікаюць найбольшую цікавасць у наведвальнікаў. Пра рацыён і памеры порцый пытаюцца і дзеці, і дарослыя.

Пражэрлівы Шархан і капрызны Веня

Самы пражэрлівы ў заапарку – амурскі тыгр Шархан. У дзень ён з'ядае 10–12 кг мяса, пераважна ялавічыны на косці і кураціны.

Іншым буйным драпежнікам патрабуецца крыху менш. Напрыклад, ільву за суткі даюць 6–7 кг мяса, ягуару і леапарду – 3–4 кг. У меню таксама ўваходзіць рыба – мінтай, салака, карп.

«Вялікім кошкам арганізуюць адзін разгрузачны дзень у тыдзень. Гэта паўтарае прыродныя звычкі драпежнікаў, у дзікай прыродзе ж удалае паляванне здараецца не кожны дзень», – расказвае Ілона Мікалайчык.

А самыя буйныя змеі заапарка – сеткаваты і тыгровы пітоны – харчуюцца ўсяго раз у некалькі месяцаў. У іх павольны метабалізм. У астатні час адпачываюць, няспешна ператраўлючы ежу. Невялікім змеям дастаткова паесці раз у тыдзень.

Адзін з самых капрызных насельнікаў – кракадзілавы кайман Веніямін. Ён харчуецца не па раскладзе, а па настроі. Калі апетыт прачнуўся, Веня можа з'есці каля 400 г ялавічыны за раз. Часам не супраць курыцы. Але ёсць нюанс: ежу кайману трэба падаваць з драўлянай лыжкі і менавіта ў тыя моманты, калі яму самому захочацца.

Пачастункі могуць нашкодзіць гадаванцам

Штогод Гродзенскі заапарк наведваюць больш за 150 тыс. чалавек.

Аднак не ўсе госці прытрымліваюцца правіл, са шкадаваннем адзначае Ілона Мікалайчык. Некаторыя ігнаруюць папярэджвальныя таблічкі і намагаюцца пабалаваць насельнікаў цукеркамі, пячэннем або здобай.

Суразмоўніца просіць нагадаць: падкормліваць жывёл нельга. Паводле яе слоў, падапечныя атрымліваюць збалансаванае харчаванне ў дастатковых аб'ёмах, а вось ласункі ад гасцей могуць нашкодзіць іх здароўю.

Дарэчы, у наступным годзе заапарк адзначыць 100-гадовы юбілей. Да гэтай круглай даты калекцыя жывёл можа папоўніцца новымі відамі.

Раней Times.by расказваў, што ў Гродзенскім заапарку жыве адзіны ў Беларусі сычуаньскі такін.