Музей «Крокі веры» адкрыўся ў Будславе

Музей з'явіўся ў аграгарадку, які з нядаўняга часу стаў духоўным цэнтрам РКЦ.

У духоўным цэнтры каталіцкай царквы ў Беларусі ў Будславе адкрыўся музей «Крокі веры», паведамілі ў прэс-службе РКЦ.

Адзначаецца, што напярэдадні дэлегацыя прадстаўнікоў органаў улады прыбыла ў санктуарый Маці Божай у Будславе, які нядаўна быў абвешчаны духоўным цэнтрам каталіцкай царквы ў рэспубліцы.

«Сумесна з прадстаўнікамі беларускага каталіцкага епіскапата яны прынялі ўдзел у адкрыцці царкоўнага музея пад назвай «Крокі веры», – гаворыцца ў паведамленні.

Паводле інфармацыі РКЦ, на цырымоніі прысутнічалі старшыня Мінаблвыканкама Аляксей Кушнарэнка, а таксама кіраўнік Мядзельскага РВК Аляксандр Прановіч. Гасцей віталі старшыня Канферэнцыі каталіцкіх біскупаў Беларусі архібіскуп Юзэф Станеўскі і вікарыі.

Яны наведалі касцёл Ушэсця Прасвятой Дзевы Марыі ў Будславе, дзе прайшла кароткая экскурсія па святыні. Затым адбылася малітва за айчыну, мір і працвітанне Беларусі.

Пазней прайшло афіцыйнае адкрыццё музея «Крокі веры», сярод экспанатаў якога – літургічнае адзенне Папы Францішка і кардынала Казіміра Свёнтэка, а таксама адрэстаўрыраваныя фігуры святых.