Нацбанк з 26 мая выпускае памятныя манеты з нацыянальнымі матывамі

Купіць манеты можна толькі на тэрыторыі краіны і па адным адрасе.

Нацыянальны банк Беларусі ў гонар юбілейнага фестывалю нацыянальных культур выпусціць новыя памятныя манеты.

Як паведамляе прэс-служба галоўнай фінансавай установы краіны, купіць манеты можна будзе з 26 мая толькі на тэрыторыі Беларусі і па адным адрасе: г. Мінск, вул. Талстога, 6.

Дызайн новай памятнай манеты ад Нацбанка прысвечаны юбілейнаму XV Рэспубліканскаму фестывалю нацыянальных культур.

На аверсе манеты – выява герба Беларусі, а ў цэнтры можна заўважыць дзяўчыну. У самым нізе красуецца проба сплаву.

На рэверсе таксама ёсць шмат цікавага. Там выявы літар, арнаментаў і сімвалаў розных нацыянальнасцей, якія ў тым ліку пражываюць на тэрыторыі Беларусі. Вакол малюнкаў размешчаны назвы народаў.

Тыраж манеты складзе 2 тысячы экзэмпляраў, а цэны будуць наступныя: медна-нікелевую манету наміналам BYN 1 можна купіць за BYN 70, сярэбраную наміналам BYN 20 прапануюць набыць за BYN 590.