У нас свой шлях: Лукашэнка расказаў аб беларускім падыходзе да выкарыстання штучнага інтэлекту

Кіраўнік дзяржавы таксама абазначыў, што штучны інтэлект (ШІ) – гэта перш за ўсё прыкладны інструмент, які павінен працаваць на карысць людзей.

Прэзідэнт выступіў на Еўразійскім эканамічным форуме ў Астане, дзе расказаў аб падыходзе Беларусі да выкарыстання сучасных тэхналогій, а асабліва ШІ. Яго словы цытуе прэс-служба.

«Для нас штучны інтэлект не самамэта, не даніна модзе і не падстава ў пагоні за хайпам адмаўляцца ад напрацаваных дзесяцігоддзямі практык. Якраз перакананы, што гэты штучны інтэлект не на пустым месцы створаны, ён вынікае з тых практык, што ўжо створаны. Гэта перш за ўсё прыкладны інструмент, які павінен рэальна працаваць на карысць людзей і вытворчасці, павышаючы эфектыўнасць эканомікі і якасць жыцця грамадзян», – заявіў Аляксандр Лукашэнка.

Кіраўнік дзяржавы таксама адзначыў, што Беларусь даўно выбрала ўласны шлях у лічбавым развіцці і прытрымліваецца яго.

«Гэта адмова ад сляпога капіравання замежных тэхналогій і правіл гульні на карысць стварэння айчынных кампетэнцый і сваіх рашэнняў», – удакладніў Прэзідэнт.

Аляксандр Лукашэнка ў ходзе выступлення закрануў тэму таго, як ШІ можа паўплываць на чалавека ў будучыні.

Паводле слоў беларускага лідара, штучны інтэлект не заменіць чалавека, а здыме з яго руцінныя задачы. Акрамя таго, новыя тэхналогіі дапамагаюць нарасціць кампетэнцыі і магчымасці інжынераў, тэхнолагаў, аграрыяў, вучоных, чыноўнікаў.

«Таму я ў пачатку прывёў вам азначэнні штучнага інтэлекту і інфарматыкі. Размова ідзе аб павышэнні ККД чалавечай працы. Там, дзе гэта сапраўды неабходна і дарэчы. Гэта вельмі важна цяпер», – удакладніў Аляксандр Лукашэнка.

Дапамога ШІ і яго перспектывы

Прэзідэнт таксама асобна акцэнтаваў увагу на перспектывах ШІ.

«Ён не стане прычынай масавай страты працоўных месцаў, а на крадзеж асабістых даных, кібермахлярства і фэйкі ёсць адэкватныя адказы – і ў тэхнічнай, і ў праваахоўнай плоскасцях», – сказаў Лукашэнка.

І заклікаў да больш цеснага супрацоўніцтва ў галіне камп'ютарных тэхналогій у рамках Еўразійскага эканамічнага саюза.

«Разлікі паказваюць, што ніводная краіна, нават з развітой інжынернай школай і моцнымі кадрамі, паасобна не здольна забяспечыць поўны цыкл стварэння, навучання і прамысловага ўкаранення сучасных мадэлей ШІ. Таму ў гэтай сферы патрэбна больш цесная кааперацыя», – заявіў Прэзідэнт.

Кіраўнік дзяржавы зрабіў акцэнт на тым, што цяпер паміж вядучымі сусветнымі ігракамі фактычна разгарнулася бітва за кантроль над сферай камп'ютарных тэхналогій.

«Мы не павінны адстаць або трапіць у залежнасць ад «добрай» волі цэнтраў сілы, якія спрабуюць навязаць свае правілы гульні. Менавіта тут праўляецца стратэгічная роля Еўразійскага эканамічнага саюза як платформы для фарміравання тэхналагічнай кааперацыі новага тыпу», – адзначыў Лукашэнка.

Кіраўнік дзяржавы лічыць, што фундамент для лічбавага ўзаемадзеяння ў ЕАЭС ужо закладзены.

«Сфарміраваны прававыя і тэхналагічныя інструменты для пераходу ад разрозненых нацыянальных ініцыятыў да адзінай еўразійскай лічбавай экасістэмы», – падкрэсліў Аляксандр Лукашэнка.

ШІ ўжо працуе на эканоміку

Кіраўнік дзяржавы адзначыў, што штучны інтэлект становіцца часткай вытворчасці ў рэальным сектары там, дзе гэта апраўдана.

«Віртуальныя мадэлі, або, як іх яшчэ называюць, лічбавыя двайнікі рэальных вытворчасцей, даюць магчымасць наладжваць тэхналагічныя працэсы да фізічнай зборкі і запуску абсталявання», – падкрэсліў Аляксандр Лукашэнка.

Ён дадаў, што айчынныя лічбавыя платформы распрацоўваюцца ў раслінаводстве, медыцыне, прамысловасці, транспартнай галіне, лагістыцы, гандлі, дзяржкіраванні і іншых сферах.

«Штучны інтэлект выкарыстоўваецца пры стварэнні лякарстваў, дыягностыцы захворванняў, дапамагае пры правядзенні найскладанейшых аперацый у кардыялогіі, анкалогіі, уралогіі. Прычым хірургі могуць кантраляваць працэс дыстанцыйна», – канстатаваў Прэзідэнт.