Вучэнні АДКБ «Непарушнае братэрства – 2026» і «Бар’ер-2026» пачаліся ў Беларусі

У вучэннях удзельнічаюць прадстаўнікі Беларусі, Казахстана, Кыргызстана, Расіі і Таджыкістана, усяго – больш за 1500 вайскоўцаў.

Дадаць у асноўныя
крыніцы Google

Адкрыццё камандна-штабнога вучэння з міратворчымі сіламі АДКБ «Непарушнае братэрства – 2026» адбылося ў Віцебску, паведамілі ў Міністэрстве абароны Рэспублікі Беларусь.

Спецыяльнае вучэнне «Бар’ер-2026» са сумесным фарміраваннем радыяцыйнай, хімічнай і біялагічнай абароны і медыцынскага забеспячэння АДКБ стартавала ў Старых Дарогах.

«Складанае становішча сведчыць, што ўзровень ваеннай небяспекі пастаянна ўзрастае», – адзначыў на адкрыцці вучэнняў начальнік Генеральнага штаба Узброеных Сіл – першы намеснік міністра абароны Рэспублікі Беларусь генерал-маёр Уладзімір Белы.

Паводле яго слоў, краіны Захаду паскоранымі тэмпамі нарошчваюць ваенны патэнцыял, што фактычна азначае падрыхтоўку да новай гарачай вайны. Менавіта таму, падкрэсліў генерал-маёр, у АДКБ умацоўваюць супрацоўніцтва ўнутры арганізацыі, удасканальваюць узаемадзеянне падчас сумеснага навучання.

«Апроч таго, што вучэнне з’яўляецца адной з мер стратэгічнага стрымлівання ў адносінах да агрэсіўна настроеных дзяржаў, мы яшчэ раз дэманструем нашыя цёплыя адносіны, узаемавыручку і адзінства нашых народаў», – заявіў Уладзімір Белы.

У сваю чаргу, намеснік начальніка Аб’яднанага штаба АДКБ генерал-лейтэнант Руслан Шпекбаеў звярнуў увагу на адну асаблівасць пачатага вучэння: акрамя воінскіх фарміраванняў да сумесных дзеянняў прыцягваюцца падраздзяленні органаў унутраных спраў, паліцыі, унутраных войскаў і войскаў нацыянальнай гвардыі.

План на вучэнне – адпрацоўка пытанняў падрыхтоўкі і правядзення міратворчай аперацыі Калектыўнымі міратворчымі сіламі АДКБ і ліквідацыі крыніц біялагічных пагроз у зоне адказнасці дадзеных сіл.

У вучэннях удзельнічаюць прадстаўнікі Беларусі, Казахстана, Кыргызстана, Расіі і Таджыкістана, усяго – больш за 1500 вайскоўцаў. Таксама задзейнічана звыш 300 адзінак узбраення, ваеннай і спецыяльнай тэхнікі, у тым ліку каля 80 рознатыповых БПЛА.