Якія беларускія распрацоўкі здзівілі на вялікай медыцынскай выставе ў Мінску

Сваю прадукцыю на выставе ў Мінску прадставілі больш за 200 удзельнікаў з Беларусі, Расіі, Венгрыі, Індыі, Кітая, Латвіі, Турцыі і Швейцарыі.

Сучасную бальніцу немагчыма ўявіць без высокатэхналагічнай тэхнікі. Беларускія мамографы экспертнага класа, устаноўкі для гіпергравітацыйнай тэрапіі, імплантаты, якія стварылі з дапамогай 3D-тэхналогій, – усё гэта наша рэальнасць.

Чым здзіўляюць айчынныя вытворцы, Times.by даведаўся на міжнародным медыцынскім форуме «Ахова здароўя Беларусі – 2026».

Выстава будзе працаваць да 15 мая і аб’яднае вядучых вытворцаў галіны.

Мамограф, каб выявіць рак грудзей

Мамаграфія лічыцца залатым стандартам ранняй дыягностыкі раку грудзей у жанчын, старэйшых за 49 гадоў. Беларускія мамографы пачалі выпускаць яшчэ ў 2000-х. На выставе прадставілі лічбавы апарат экспертнага класа – каля 20 такіх ужо ўстаноўлены ў бальніцах.

Сярод іх Мінскі гарадскі клінічны цэнтр гінекалогіі, раддом у Барысаве, цэнтральная раённая бальніца ў Слоніме і Магілёўскі абласны анкадыспансер.

Такія мамографы таксама прадаюць і на расійскім рынку.

«Гэта дыягнастычныя апараты для бальніц, – тлумачыць Яўген Мікуліч, менеджар прадукту кампаніі Advin. – У мамографе ёсць функцыя тамасінтэзу. Гэта перадавая тэхналогія паслойнага рэнтген-сканіравання малочнай залозы».

Дзякуючы тамасінтэзу змяненні ў органе бачныя на ранняй стадыі. Прычым пры самым малым падазрэнні ўрач можа ўзяць біяпсію непасрэдна на месцы, падключыўшы да мамографа спецыяльны апарат.

Імплантаты, якія могуць замясціць любую косць

Замясціць косць пасля анкалагічнай аперацыі або цяжкай траўмы можна з дапамогай індывідуальнага імплантата. Свае распрацоўкі на форуме прэзентаваў рэзідэнт індустрыяльнага парка «Вялікі камень» Human Craft.

Вытворца выпускае тытанавыя імплантаты пад кожнага пацыента і, паводле слоў фінансавага дырэктара кампаніі Антона Чарнышова, змог ужо імпартазамясціць каля 95% прадукцыі на айчынным рынку.

Індывідуальныя імплантаты ў тым ліку выкарыстоўваюць у анкалогіі, траўматалогіі, стаматалогіі і сківічна-тварнай хірургіі.

Напрыклад, пацыенту трэба замяніць частку косці. Вытворца атрымлівае КТ-здымак, стварае мадэль імплантата, які анатамічна адпавядае дэфекту, узгадняе ўсё з хірургам і з дапамогай 3D-прынтара робіць выраб.

На распрацоўку аднаго такога імплантата патрабуецца каля сямі дзён, у той час як у свеце тэрмін вырабу можа дасягаць двух-трох месяцаў.

Аздараўленне з дапамогай штучнай сілы цяжару

У Беларусі ўжо 16 пацыентаў адчулі на сабе, што такое гіпергравітацыйная тэрапія. Яе праходзяць у спецыяльнай устаноўцы, якая нагадвае капсулу. Распрацавалі апарат на прадпрыемстве «НВА Цэнтр», а ў праекце ўдзельнічаў Беларускі дзяржаўны медыцынскі ўніверсітэт.

«Чалавек кладзецца ў капсулу, да яго падключаюць спецыяльныя датчыкі, уключаецца святло – і ўстаноўка пачынае круціцца, – тлумачыць прынцып работы вядучы спецыяліст па маркетынгу «НВА Цэнтр» Святлана Лукашэвіч. – Адбываецца 47 абаротаў у хвіліну».

Чалавек аздараўліваецца дзякуючы штучнай сіле цяжару і пераразмеркаванню крыві ў арганізме.

Гіпергравітацыйную тэрапію ўжываюць спартсмены, каб аднавіцца пасля трэніровак, таксама яе выкарыстоўваюць пры сардэчна-сасудзістых захворваннях, у гінекалогіі, артапедыі і хірургіі.

Курс аздараўлення прадугледжвае мінімум дзесяць працэдур. Працягласць адной – ад васьмі хвілін.

Набор, каб выдаліць зубны налёт

Ноу-хау для стаматалагічных кабінетаў прэзентавала навукова-даследчая лабараторыя «Прыкладная плазмоніка» Беларускага дзяржаўнага ўніверсітэта інфарматыкі і радыёэлектронікі. Гэта набор для фотастымуляванага выдалення зубнога налёту.

Яго прынцып дзеяння просты: на зубы трэба нанесці антыбактэрыяльнае пакрыццё з часціц серабра – і налёт адслоіцца пад уздзеяннем святла.

Самае важнае, што зубную эмаль для гэтага не трэба награваць, – такім чынам захоўваецца здароўе зубоў.

Эвакуацыйнае крэсла для хуткай дапамогі

Машыны хуткай дапамогі ў Беларусі ўжо тры гады аснашчаюць айчыннымі эвакуацыйнымі крэсламі вытворчасці прадпрыемства «Медтэхнацэнтр».

«Раней мы выкарыстоўвалі імпартныя, але нашы па якасці зборкі і функцыянале нічым не саступаюць», – тлумачыць намеснік начальніка аддзела маркетынгу прадпрыемства Ілья Шэлег.

Крэслы выкарыстоўваюць, каб бяспечна перамясціць пацыента з кватэры ў хуткую дапамогу. Асабліва гэта актуальна, калі ў пад'ездзе няма ліфта або вузкія лесвіцы.

Рэагенты, каб зразумець, як працуе імунітэт

Калі чалавек часта хварэе, каб праверыць імунны статус, урач можа назначыць спецыяльны аналіз. Для яго патрэбны рэагенты, і на айчынным рынку ў тым ліку папулярныя беларускія.

«Лабараторыі актыўна карыстаюцца нашымі рэагентамі, пры гэтым іх закупляюць і ў Расіі, – расказвае Марыя Варанько, кіраўнік групы імунааналізу «Альгімед Тэхна».

Вытворца выпусціў рэагенты паўгода таму, а цяпер рыхтуе да рэгістрацыі прыбор, які дапаможа расшыфраваць аналіз на імунны статус.