Якія медпаслугі карыстаюцца папулярнасцю ў іншаземцаў у Беларусі

Замежныя турысты выбіраюць нашу медыцыну з-за даступных цэн, высокай якасці аказання паслуг і бяспечнага знаходжання ў краіне.

Медыцынскі турызм у Беларусі набірае папулярнасць сярод замежных грамадзян. За якімі паслугамі да нас едуць іншаземцы, расказаў каардынатар медтурызму пры камітэце па ахове здароўя Мінгарвыканкама Аляксандр Трус.

Паводле слоў спецыяліста, за апошнія пяць гадоў аб'ём медыцынскіх паслуг, аказаных іншаземцам, павялічыўся ў 1,5 раза.

Прыезджых прыцягваюць высокая якасць медыцыны, бяспека знаходжання ў краіне, хуткасць аказання дапамогі і канкурэнтаздольныя цэны.

За мінулы год Беларусь наведалі грамадзяне з 160 краін. Так, у Мінску па колькасці турыстаў лідзіруе Казахстан, далей – Расія і замыкае топ-3 Боснія і Герцагавіна.

Акрамя таго, дзякуючы дзяржпалітыцы па развіцці адносін з Афрыкай значна вырас паток пацыентаў з гэтага кантынента. Часцей за ўсё яны прыязджаюць за афтальмалагічнымі працэдурамі.

«Калі раней мы ў асноўным працавалі з краінамі СНД, то цяпер ахопліваем увесь свет. Гэтаму садзейнічае і візавая палітыка Беларусі», – адзначыў Аляксандр Трус.

Самымі запатрабаванымі паслугамі ў іншаземцаў з'яўляюцца транспланталогія, медыцынскія агляды, дыягностыка, анкалогія, стаматалогія, акушэрства і гінекалогія.

Акрамя таго, для гасцей сталіцы распрацоўваюць комплексныя медыцынскія туры, якія ўключаюць не толькі лячэнне, але і прагулкі па горадзе, наведванне рэстаранаў і іншыя мерапрыемствы.

Раней Times.by пісаў, што іншаземцы сталі яшчэ часцей адпачываць у беларускіх санаторыях. Амаль палова экспарту турыстычных паслуг прыпадае на айчынныя здраўніцы.

У 2025 годзе ў санаторыях Беларусі адпачылі прыкладна 260 тыс. іншаземцаў з 80 краін свету. Такім чынам, пабіты рэкорд 2024 года – тады ў здраўніцах аздаравіліся больш за 246 тыс. турыстаў. Для параўнання: у 2023 годзе – 217,5 тыс. іншаземцаў, у 2022-м – больш за 188 тыс.