Актыўны выхадны: як прайшла чарговая фітнес-субота праекта «Спорт для ўсіх»

У беларускай сталіцы, нягледзячы на надвор'е, адбылася трэніроўка, арганізаваная Прэзідэнцкім спартыўным клубам.

Замест размераных прагулак у парку Цівалі – выразны рытм музыкі для стэп-аэробікі, замест спакойнага адпачынку – фізічныя нагрузкі.

Карэспандэнты Times.by апынуліся ў самым цэнтры падзей, каб зафіксаваць, як мінчане займаюцца спортам пад адкрытым небам.

Пляцоўка парку напоўнена рознымі фітнес-зонамі і спартыўнымі снарадамі, дзе кожны знойдзе нагрузку для свайго ўзроўню.

На адной зоне ўдзельнікі паглыбляліся ў гармонію з дапамогай ёгі, на другой – умацоўвалі мышцы на трэніроўцы power body, а на трэцяй – пад дынамічную музыку займаліся на стэп-платформах.

Астатнія жадаючыя далучыцца да спорту маглі паспрабаваць сябе ў дартсе, настольным тэнісе, шашках і шахматах.

Зона ёгі стала своеасаблівым «месцам спакою». Тут госці праекта вучыліся чуць сваё цела, плаўна пераходзячы з асаны ў асану.

Зусім недалёка размясцілася цалкам процілеглая па дынаміцы зона. Пад хуткі тэмп гарачай музыкі фанаты стэп-аэробікі сінхронна скакалі і заступалі на спецыяльныя платформы.

Дарэчы, стэп-аэробіка садзейнічае ўмацаванню мышцаў, змяншэнню падскурнага тлушчу і падцягванню скуры. За адну трэніроўку можна страціць ад 400 да 500 ккал!

Трэніроўка power body – месца для тых, хто любіць сілавыя практыкаванні. Работа з уласнай вагой і ўцяжарвальнікамі пад кіраўніцтвам прафесійнага трэнера падыдзе і навічкам, і аматарам.

Праект «Спорт для ўсіх» дакладна падыходзіць для жадаючых падтрымліваць спартыўную форму або паспрабаваць нешта новае. Патрэбны толькі жаданне і кампанія аднадумцаў.

«У гэтым годзе я пачала наведваць трэніроўкі Прэзідэнцкага клуба. Выпадкова ўбачыла гэта ў Instagram і падпісалася на ўсе яго сацсеткі. Я хаджу сюды для сябе і каб падтрымліваць сілу волі», – сказала ўдзельніца праекта Надзея.

Паводле яе слоў, яна хоча паспрабаваць усе трэніроўкі, якія ёсць, але больш падабаюцца бегавыя, кросфіт і зумба.

«Гэты праект палепшыў маё жыццё. Вялікі дзякуй! Усіх запрашаю – хачу тут знайсці новых сяброў», – сказала на заканчэнне мінчанка.

Нагадаем, летнія трэніроўкі на адкрытым паветры ў Мінску – гэта праект Прэзідэнцкага спартыўнага клуба і Мінгарвыканкама, які дэбютаваў у 2025 годзе.