Беларусбанк зноў зменшыў стаўкі па крэдытах на жыллё

Умовы палепшыліся па адным з самых папулярных прадуктаў.

Беларусбанк зноў знізіў стаўкі па крэдытах, якія выдаюць на будаўніцтва і набыццё жылля.

Як адзначылі ў прэс-службе банка, змяніліся ўмовы прадастаўлення пазыкі пад назвай «Іпатэка экспрэс».

Цяпер гэты прадукт можна аформіць пад 15,4% гадавых. Такі працэнт будзе дзейнічаць для грамадзян, якія набываюць нерухомасць на другасным рынку. Тыя, хто мае патрэбу ў паляпшэнні жыллёвых умоў, могуць атрымаць крэдыт пад 14% гадавых.

Калі набываць кватэру ў забудоўшчыка, то стаўка па крэдыце «Іпатэка экспрэс» складзе 14,4% гадавых. Асобна Беларусбанк акцэнтаваў увагу на тым, што змяніліся стаўкі і па іншых крэдытах.

Дарэчы, апошні раз вядучы банк краіны мяняў умовы прадастаўлення сваіх прадуктаў 25 красавіка.