Беларуская федэрацыя гандбола просіць IHF выдаць зборнай wild card на чэмпіянат свету

У БФГ лічаць, што гэта было б кампенсацыяй за адхіленне беларусаў-гандбалістаў ад міжнародных спаборніцтваў.

Кіраўнік Беларускай федэрацыі гандбола Уладзімір Канаплёў правёў тэлефонную размову з кіраўніком Міжнароднай федэрацыі гандбола (IHF) Хасанам Мустафой, паведаміла прэс-служба арганізацыі.

Адзначаецца, што яны абмеркавалі магчымы ўдзел беларускай мужчынскай каманды ў чэмпіянаце свету, які адбудзецца ў Германіі ў студзені наступнага года. У канцы бягучага тыдня савет IHF вызначыць, хто атрымае дзве wild card на топ-турнір.

«У ходзе размовы кіраўнік БФГ неаднаразова настойліва папрасіў Хасана Мустафу прыняць у дачыненні да Беларусі станоўчае рашэнне аб выдзяленні wild card», – гаворыцца ў паведамленні.

Канаплёў нагадаў, што ў лютым 2022 года МАК незаконна рэкамендаваў адхіліць каманды Беларусі ад удзелу ў міжнародных спаборніцтвах, парушыўшы тым самым прынцыпы Алімпійскай хартыі. Цяпер МАК адмяніў гэтыя рэкамендацыі.

Кіраўнік федэрацыі папрасіў улічыць гэтыя абставіны і ў якасці кампенсацыі за несправядлівую дыскваліфікацыю дапусціць зборную Беларусі да будучага чэмпіяната свету.

У БФГ расказалі, што федэрацыя раней неаднаразова звярталася да прэзідэнта IHF аб выдзяленні беларусам wild card на ЧС-2027.