Беларускія класікі загаварылі на мовах Садружнасці

Выданне шматмоўных паэтычных зборнікаў стала традыцыяй для беларускіх кнігавыдаўцоў.

«Хто мы такія?/ Толькі падарожныя, – папутнікі сярод нябёс./ Нашто ж на зямлі/ Сваркі і звадкі, боль і горыч,/ Калі ўсе мы разам ляцім/ Да зор?» – гэтыя радкі Максіма Багдановіча даўно сталі любімымі для кожнага, хто шануе родную беларускую мову, хто атрымлівае асалоду ад чытання паэтычных твораў па-беларуску.

У кнігу «Янка Купала, Якуб Колас, Максім Багдановіч на мовах народаў Садружнасці Незалежных Дзяржаў», акрамя неўміручых радкоў аўтара «Вянка», увайшлі і вершы народных паэтаў Беларусі Янкі Купалы («Я люблю» з легендарнага цыкла «Санеты») і Якуба Коласа («Родныя вобразы»). Кожны з класічных твораў, акрамя як на роднай, пададзены на дзевяці мовах народаў СНД – азербайджанскай, армянскай, казахскай, кыргызскай, малдаўскай, рускай, таджыкскай, туркменскай, узбекскай.

Тэкставую частку кнігі дапаўняюць рэпрадукцыі з карцін, партрэтаў, прысвечаных паэтам-класікам. Іх аўтары – народныя мастакі Беларусі Леанід Шчамялёў, Георгій Паплаўскі, жывапісцы Анатоль Наліваеў, Зянон Паўлоўскі, Юрый Хілько, Раіса Кудрэвіч, Уладзімір Кожух, народны мастак СССР Міхаіл Савіцкі. Сустрэчы з вершамі класікаў і іх выявамі ствараюць эмацыянальнае яднанне, падштурхоўваюць да асэнсавання велічы творцаў і іх злучанасці з народам і падзеямі, якімі было напоўнена XX стагоддзе.

Сярод перакладчыкаў паэтычных радкоў Купалы, Коласа, Багдановіча – азербайджанская пісьменніца Флора Наджы, армянскі літаратар Сусана Казаран, казахскі мастак слова Саят Камшыгер, туркменскія рупліўцы Чэмен Анабердыева, Джумагельды Мулкіеў, рускія паэты Максім Замшаў, Юрый Шчарбакоў, Аляксей Арцёмаў.

Раней беларускія кнігавыдаўцы падрыхтавалi да друку анталогіі «А хто там ідзе?» на мовах свету» Янкі Купалы, «Францыск Скарына на мовах народаў свету», а таксама кніга «Санетаў» Янкі Купалы ў пераўвасабленні на розныя мовы.