Беларускія лучнікі могуць выступаць на сусветнай арэне са сцягам і гімнам

Сусветныя спартыўныя федэрацыі адна за адной пасля рэкамендацый МАК здымаюць санкцыі з беларускіх атлетаў.

Беларускія лучнікі могуць удзельнічаць у спаборніцтвах пад эгідай Сусветнай федэрацыі стральбы з лука без абмежаванняў, паведамілі ў прэс-службе Нацыянальнага алімпійскага камітэта (НАК) Беларусі.

«На падставе рэкамендацый МАК пасля абмеркаванняў і ў інтарэсах спартсменаў Сусветная федэрацыя стральбы з лука (WAEB) на пасяджэнні Выканкама арганізацыі прыняла рашэнне зняць усе абмежаванні на ўдзел беларускіх спартсменаў і каманд у спаборніцтвах пад эгідай Сусветнай федэрацыі стральбы з лука», – гаворыцца ў паведамленні.

Цяпер, як адзначылі ў НАК, слова за Еўрапейскай федэрацыяй.

У маі Міжнародны алімпійскі камітэт аб’явіў аб зняцці санкцый з беларускіх спартсменаў – гэта значыць, што атлеты з Беларусі могуць выступаць на міжнародных турнірах са сваім гімнам і сцягам і без якіх-небудзь абмежаванняў. Пасля гэтага шэраг міжнародных спартыўных федэрацый далучыліся да рашэння МАК.

Times.by ў сваім спецпраекце расказваў, дарэчы, чым карысная стральба з лука, у якім узросце ёй можна займацца і якія дасягненні ў гэтым відзе спорту ў беларусаў.