Беларускія «мастачкі» ўпершыню за 5 гадоў прывезлі медалі з ЧЕ

Апошні раз еўрапейскі турнір з удзелам нашых грацый, якія выступалі са сцягам і з гімнам, прайшоў у 2021 годзе.

Беларускія «мастачкі» ўвозяць два сярэбраныя медалі з чэмпіянату Еўропы, які прайшоў у Балгарыі.

Першы медаль краіне прынесла лідар каманды Аліна Гарнасько. У практыкаваннях з абручом яна ўступіла толькі адну сотую бала 15-гадовай расіянцы Сафіі Ільцераковай. Трэцяе месца заняла італьянка Сафія Рафаэлі.

Акрамя таго, напярэдадні беларуска заняла крыўднае чацвёртае месца ў індывідуальным мнагаборстве. Бронзавай медалістцы, украінцы Таісіі Анафрыйчук, Гарнасько ўступіла ўсяго паўбала. Таксама Аліна стала сёмай у практыкаваннях з мячом.

Яшчэ адно серабро беларускі заваявалі ў групавых практыкаваннях з мячамі. Паліна Аляксандрава, Сафія Барысевіч, Валерыя Мальковіч, Ганна Шакун, Кір’яна Шаўцова і Таісія Ярчак паказалі вынік 27,550 бала. Залатыя медалі дасталіся іспанкам, а бронзавыя – ізраільскім грацыям.

Таксама нашы «групавічкі» сталі чацвёртымі ў мнагаборстве, уступіўшы месцы на п’едэстале Іспаніі, Расіі і Ізраілю.

Чэмпіянат Еўропы ў Балгарыі – першы за пяць гадоў міжнародны турнір з удзелам беларусак. Апошні раз на кантынентальным першынстве нашы грацыі выступалі ў 2021 годзе. Тады турнір, як і цяпер, праходзіў у Балгарыі, «мастачкі» з Беларусі заваявалі шэсць медалёў – два серабра і чатыры бронзы.

З 2022 па 2026 гады ў дачыненні да спартсменак з Беларусі і Расіі дзейнічалі міжнародныя санкцыі. Яны былі знятыя якраз перад чэмпіянатам Еўропы ў Балгарыі. З гэтага часу нашы гімнасткі могуць выступаць на турнірах за мяжой са сцягам і з гімнам.