Дачу пісьменніка Алеся Бачылы прадаюць пад Мінскам

З плюсаў – не толькі гістарычная каштоўнасць доміка ў вёсцы, але і зручнае размяшчэнне і інтэлігентныя суседзі.

Пад Мінскам выставілі на продаж дачу беларускага пісьменніка Алеся Бачылы. Двухпавярховы дом размешчаны ў садовым таварыстве Саюза пісьменнікаў «Узгор’е-2», што за 17 км ад МКАД, паведамляе Realt.by.

Першы паверх – два пакоі і кухня – заязджай і жыві. А вось мансарда на другім узроўні, адкрыта папярэджваюць, патрабуе рамонту.

З выгод – пячное ацяпленне і сезонная вада: на зіму сістэму давядзецца кансерваваць, каб трубы не патрэскаліся. У камплект прыкладаецца летняя кухня і кампактны ўчастак зямлі з дагледжаным газонам.

З дадатковых «плюшак»: магазін, які працуе круглы год, і аўтакрама, якая наведваецца два разы на тыдзень.

Галоўная ж каштоўнасць – інтэлігентнае асяроддзе, якое, як гаворыцца ў аб’яве, будзе рада новаму суседу.

Асобны плюс – блізкае размяшчэнне ад Мінска і зручнае транспартнае злучэнне ў выпадку, калі няма свайго аўто. Тут вам і электрычка, і аўтобус з маршруткай прама да станцыі метро «Пушкінская».

Набыць гістарычную каштоўнасць у асабістае карыстанне можна за $20 тыс.

Раней Times.by паведамляў пра тое, што ў Беларусі на продаж выставілі асабняк «з прывідамі». Гэта панская сядзіба з багатай гісторыяй.

У апошнія гады сядзіба пуставала. Рыэлтары намякаюць на тое, што ў ёй маглі пасяліцца прывіды.

«Гэта дом, які, верагодна, абзавёўся сваімі прывідамі за больш чым 100 гадоў свайго існавання», – гаворыцца ў аб’яве.