«Белавія» можа непасрэдна купляць самалёты Boeing

Беларуская кампанія атрымала гэту магчымасць дзякуючы перагаворам Аляксандра Лукашэнкі з амерыканскімі дыпламатамі.

Дадаць у асноўныя
крыніцы Google

Злучаныя Штаты знялі абмежаванні на супрацоўніцтва карпарацыі Boeing з «Белавія», расказаў генеральны дырэктар беларускай авіякампаніі Ігар Чаргінец.

Паводле яго слоў, сёння амерыканскае Міністэрства гандлю дало дазвол Boeing на ўзаемадзеянне з беларускім бокам.

«Гэта дазволіць «Белавія» напрамую атрымліваць запасныя часткі, кампаненты, праграмнае забеспячэнне па самалётах, якія ёсць у авіякампаніі. Акрамя таго, гэта адкрывае дарогу да правядзення перамоў па набыцці самалётаў напрамую ў карпарацыі Boeing», – цытуе Ігара Чаргінца БелТА.

Раней аналагічны дазвол выдаў амерыканскі Мінфін, што дало «Белавія» магчымасць непасрэдна працаваць з авіяцыйным гігантам у ЗША.

«Год таму ўрад ЗША выдаў дазвол, які зняў усе санкцыі, палітычныя санкцыі, у дачыненні да «Белавія», – нагадаў генеральны дырэктар беларускай кампаніі.

Ігар Чаргінец звярнуў асаблівую ўвагу, што гэта стала магчымым толькі дзякуючы перагаворам Прэзідэнта Беларусі Аляксандра Лукашэнкі з амерыканскай дэлегацыяй.