Дзе і як правесці «Ноч музеяў – 2026» у Беларусі

Міжнародная акцыя «Ноч музеяў» пройдзе ў Беларусі 16–17 мая. Times.by сабраў самыя цікавыя лакацыі.

Тэмай гэтага года сталі «музеі, якія яднаюць падзелены свет». У гэту ноч музеі ва ўсіх рэгіёнах рэспублікі прапануюць незвычайныя інтэрактывы для сваіх гасцей. Times.by вывучыў усе праграмы і выбраў самыя яркія прапановы.

Брэсцкая вобласць

Брэсцкі абласны краязнаўчы музей удзельнічае ў акцыі кожны год. Аднак у гэты раз праграму ён трымае ў тайне. Вядома, што падзею прысвецяць беларускай жанчыне.

Кобрынскі ваенна-гістарычны музей імя А.В. Суворава запрашае на квэст «Юбілейны дэтэктыў. Сувязь часоў», які прысвечаны 80-годдзю ўстановы. Наведвальнікам прапануюць адчуць сябе сышчыкамі: разгадаць гістарычныя загадкі і пазнаёміцца з героямі з мінулага.

Віцебская вобласць

Самую вялікую і яркую праграму падрыхтавалі ў музеі-сядзібе «Здраўнёва»: дыскатэка «Хіты 80–90-х», катанне на цеплаходзе па Заходняй Дзвіне, выступленне народных ансамбляў, тэатральныя перформансы і спектаклі, палёты на паветраным шары, кулачныя баі, майстар-класы па сярэдневяковых танцах і фехтаванні. Гасцей чакаюць з 19:00 да 23:00. Яркім завяршэннем стане фаер-шоу. Сядзіба знаходзіцца за межай горада, таму для наведвальнікаў прадугледзелі трансферы, якія будуць адпраўляцца ад чыгуначнага вакзала.

Вельмі насычаная праграма запланавана ў Нацыянальным Полацкім гісторыка-культурным музеі-запаведніку. Музей беларускага кнігадрукавання, напрыклад, падрыхтаваў экскурсію-тэатралізацыю. Трапіць на мерапрыемства, якое будзе праходзіць з 20:00 да 21:30, можна толькі па папярэднім запісе. Для звычайных наведвальнікаў музей у гэты час будзе закрыты.

У Доміку Пятра I можна далучыцца да беларускіх народных гульняў, а ў Музеі гісторыі архітэктуры Сафійскага сабора – паслухаць канцэрт электроннай музыкі «Адценні вечнасці» ў выкананні піяніста Арсенія Садыкава.

Гомельская вобласць

Гомельскі палацава-паркавы ансамбль запрашае 23 мая з 19:00 да 22:30 на «Ноч музеяў – 2026: АРТ-Кола». У праграме ёсць усё для добрага правядзення часу: ад харэаграфічнага спектакля, які спалучае самабытныя элементы нацыянальнай культуры з сучаснымі пластычнымі вобразамі, да мелодый цымбалаў у Калоннай зале, што адклікаюцца ў самай глыбіні сэрца, ад малявання па пяску і арнаментаў на кераміцы да алегарычных шматслойных кампазіцый беларускіх мастакоў XXI стагоддзя.

У Жлобінскім гісторыка-краязнаўчым музеі правядуць «АРХЕА-НОЧ». Гасцям прапануюць акунуцца ў атмасферу мінулага: пагуляць у неалітычныя забавы, заняцца першабытнай творчасцю, далучыцца да ляснога чаяпіцця. У завяршэнні – агнявое шоу і конкурс першабытных касцюмаў.

Гродзенская вобласць

Астравецкі гісторыка-этнаграфічны музей прадставіць праграму «Жаночы код Астравеччыны». Яна пачнецца 15 мая ў 15:00, тых, хто прыйшоў, чакаюць «Подыум жаночых гісторый», майстар-класы, розыгрышы, інтэрактыўныя зоны і шмат іншага.

Адчуць сябе дэтэктывамі змогуць госці Ваенна-гістарычнага музея ў Ваўкавыску. Арганізатары падрыхтавалі квэст-гульню, у якой удзельнікам трэба будзе знайсці зніклы экспанат. Пачатак 16 мая ў 18:00.

Лідскі гісторыка-мастацкі музей запрашае на «Ноч музеяў» 15 мая з 18:00 да 22:00. Гасцей пазнаёмяць з побытам Ліды канца XIX стагоддзя і навучаць рабіць папяровыя галаўныя ўборы, пачастуюць мясцовым квасам.

Мінск і Мінскі раён

Музей беларускага народнага мастацтва запрашае 16 мая з 10:00 да 17:00. Будуць працаваць розныя пляцоўкі, у тым ліку арганізуюць зборныя экскурсіі. Усе жадаючыя змогуць праверыць свае веды беларускай мовы, а таксама далучыцца да майстар-класа па завязванні наміткі і саломапляценні.

У Мастацкім музеі акцыя таксама пройдзе ў суботу, але з 19:00 да 01:00 і будзе прысвечана сіняму колеру. Адценне выбралі не выпадкова: гэты колер у выяўленчым мастацтве прайшоў доўгі шлях ад каштоўнага ўльтрамарыну эпохі Адраджэння да колеру кахання Марка Шагала. Сіні асацыюецца з даверам, глыбінёй, спакоем і ўзвышанасцю. А яшчэ – з Беларуссю, якая славіцца як край рэк і азёр, ільну і палявых васількоў, гаворыцца ў прэс-рэлізе ўстановы.

У Нацыянальным цэнтры сучасных мастацтваў можна будзе не толькі наведаць выставы, але і паўдзельнічаць у творчых дыскусіях. Тэма адной з іх – цяжкасці разумення гледачом мастака. Ёй прысвечана выстава «Цяжкасці перакладу» ў НЦСМ, Times.by расказваў пра яе раней. Цяпер наведвальнікам прапануюць абмеркаваць убачанае на экспазіцыі.

Магілёўская вобласць

У Магілёўскім музеі этнаграфіі 15 мая з 18:00 да 23:00 пройдзе майстар-клас па фатаграфіі і кавальскім майстэрстве, урокі бальных танцаў і, вядома ж, экскурсіі. Апошнія пройдуць у нязвычным фармаце: экскурсаводы ў народных касцюмах будуць не толькі расказваць пра экспазіцыі, але і праводзіць абрады і віктарыны.

Мсціслаўскі раённы гісторыка-археалагічны музей запрашае наведаць «Ноч музеяў» два дні запар – 15 і 16 мая. Наведвальнікам прапануюць паўдзельнічаць у квэсце-гульні «Музейны сышчык», напісаць ліст у мінулае або будучыню і праверыць свае веды ў віктарыне «Слоўнік пакаленняў: старое, новае, вечнае». У праграме таксама майстар-класы.

У Клічаўскім краязнаўчым музеі акцыю прысвяцілі фізічнай культуры. У праграме 15 мая з 19:00 да 23:00 – знаёмства з гісторыяй фізічнай культуры, спорту і гучных спартыўных перамог зямлякоў, гульні, конкурсы, спаборніцтвы, майстар-класы, музыка.

Акцыя пройдзе практычна ва ўсіх музеях рэспублікі. Больш падрабязна з праграмамі розных устаноў можна азнаёміцца на сайце «Ночы музеяў».