У будынку Нацыянальнага мастацкага музея будуць тры новыя пастаянныя экспазіцыі

Будынак знаходзіцца на маштабнай рэканструкцыі, пасля завяршэння якой у цэнтры беларускай сталіцы з'явіцца адзіная культурная прастора – Музейны квартал.

Дадаць у асноўныя
крыніцы Google

Да адкрыцця ў галоўным будынку Нацыянальнага мастацкага музея з'явяцца тры новыя пастаянныя экспазіцыі: «Традыцыйнае народнае мастацтва Беларусі», «Руская ікона» і «Злепкі».

У новых залах таксама размесцяцца заходнееўрапейскае мастацтва і экспазіцыя краін Усходу.

«Дадатковыя плошчы дазволяць паказаць значную частку твораў, якія раней не экспанаваліся», – расказала агенцтву «Минск-Новости» генеральны дырэктар музея Ірына Мацяс.

Сёння ў фондах установы захоўваецца больш за 40 тыс. прадметаў, раней выставачныя плошчы музея не дазвалялі дэманстраваць іх усе.

Пакуль ідзе рамонт галоўнага корпуса, работы, якія экспанаваліся ў залах, пераехалі ў фондасховішча або адправіліся на выставы ў іншыя гарады і краіны.

Адкрыццё Музейнага квартала для шырокай публікі плануецца ў 2028 годзе.

У адзінае цэлае аб'яднаюць асноўны корпус і будынак дырэкцыі з дапамогай устаўкі-пераходу, дзе будуць размяшчацца дадатковыя залы. Таксама яны будуць злучацца з рэстаўрацыйнымі майстэрнямі. Мадэрнізуюць службовыя памяшканні: пашырацца фондасховішчы і архіў. З'явіцца сучасная лекцыйная зала, скульптурны дворык.