Гістарычнае вяртанне: шэдэўр Шагала «Над горадам» можна ўбачыць у Віцебску

Не прапусціце шанц дакрануцца да цудоўнага – легендарную карціну Марка Шагала «Над горадам» прывезлі на радзіму мастака.

У Віцебску адкрылася выстава карціны Марка Шагала «Над горадам». Знакамітае палатно з Траццякоўкі заняло асобную залу ў Мастацкім музеі абласнога цэнтра і прабудзе тут два месяцы.

Гэтыя гастролі сталі магчымымі дзякуючы перагаворам Мінкультуры Беларусі і Траццякоўскай галерэі. Тое, што ўсё атрымалася, – сведчанне даверу паміж музеямі дзвюх краін, вынік працяглай навуковай работы, а таксама сур'ёзная падтрымка буйнога банка рэспублікі.

На цырымоніі адкрыцця выставы яе ўдзельнікі назвалі падзею гістарычнай. У ліку гасцей быў міністр культуры Марат Маркаў.

Наведвальнікам нагадалі, што карціну «Над горадам» Шагал пісаў з 1914 па 1918 год. З 1929 года палатно захоўваецца ў зборы Траццякоўскай галерэі і з таго часу ні разу не вярталася ў горад свайго стварэння.

На карціне намаляваны палёт над Віцебскам мастака і яго жонкі Бэлы (у дзявоцтве Берта Разенфельд). Пад імі – ускраіна з драўлянымі домікамі, садамі і доўгімі агароджамі, што ўюцца стужкай, а ўдалечыні – гарадскі цэнтр, які выдае сябе белым саборам з зялёным дахам.

«Мой сумны і вясёлы горад! Плятні і дахі, зрубы і агароджы і ўсё, што адкрывалася далей, за імі, захапляла мяне. Што іменна, вы можаце ўбачыць на маёй карціне «Над горадам», – так у свой час апісаў Віцебск мастак.

Палатно ўваходзіць у трыпціх, прысвечаны каханай музе і жонцы, разам з «Двайным партрэтам» і «Прагулкай».

Акрамя «Над горадам», у адной зале выстаўлены яшчэ два знакавыя палатны: з фондаў Нацыянальнага мастацкага музея ў абласны цэнтр прывезлі «Партрэт Марка Шагала» аўтарства Юдэля Пэна і яго аўтапартрэт. Менавіта Пэн быў першым настаўнікам Шагала.

Раней Times.by пісаў, што «Прагулку» можна ўбачыць да кастрычніка ў Мінску ў Нацыянальным мастацкім музеі. Туды, нагадаем, карціну прывезлі з Рускага музея ў Санкт-Пецярбургу.