Гісторык расказаў, якія залы будуць у новым Нацыянальным гістарычным музеі

Музей размесціцца на плошчы каля 20 тыс. квадратных метраў, а дабудаваць яго плануюць да лістапада 2026 года.

У новым Нацыянальным гістарычным музеі будуць выставачныя залы, прысвечаныя станаўленню Беларусі са старажытных часоў да сучаснасці.

Канцэпцыю музея раней абазначыў Прэзідэнт Беларусі Аляксандр Лукашэнка.

«Ён на нарадзе сказаў, што ў музей павінны прыйсці турысты, маладыя людзі, прайсці па ўсіх залах і выйсці адтуль патрыётам Беларусі, калі мы гаворым пра жыхара Беларусі. Быць упэўненым у прыгажосці, унікальнасці тысячагадовай гісторыі Беларусі. Усе залы Нацыянальнага гістарычнага музея будуць прасякнуты гэтай дзіўнай гісторыяй. Гісторыяй гераізму, людзей, падзей», – сказаў у эфіры СТБ дырэктар Інстытута гісторыі Нацыянальнай акадэміі навук Вадзім Лакіза.

Экспазіцыя музея будзе адлюстроўваць гісторыю Полацкага, Тураўскага княстваў, перыяд Вялікага княства Літоўскага, Расійскай імперыі, нацыянальныя формы беларускай дзяржаўнасці, савецкі перыяд і час сучаснай Беларусі.

У музеі таксама будуць залы, прысвечаныя гісторыі Вялікай Айчыннай вайны і генацыду беларускага народа.

«Ты як падымаешся са старажытнасці, з гэтага моманту, з якога мы выйшлі, там будуць усе перыяды абазначаны, напрыклад палеаліт, мезаліт, бронзавы век, эпоха Сярэдневякоўя, археалагічныя артэфакты. Мне як археолагу і гісторыку вельмі важна, што мы будзем паказваць арыгінальныя артэфакты вельмі многія, у тым ліку якія выяўлены ў выніку найноўшых археалагічных даследаванняў ужо ў сучаснай Рэспубліцы Беларусь», – адзначыў Вадзім Лакіза.

Раней Times.by расказваў, што ў новым будынку Нацыянальнага гістарычнага музея з'явіцца зала беларускай дыпламатыі.