Конкурс на стварэнне новага турыстычнага сімвала правядуць у Беларусі

Плануецца, што новы сімвал дапаможа турыстам лепш сфарміраваць уяўленне пра Беларусь.

Нацыянальны конкурс «Вобраз Беларусі. Позірк і адкрыццё» на стварэнне турыстычнага сімвала краіны стартуе ў чэрвені 2026 года, паведамілі ў прэс-службе ўрада.

Мерапрыемства пройдзе ў чэрвені – жніўні ў адкрытым фармаце. Падчас конкурсу плануецца вызначыць найлепшы лагатып, слоган і канцэпцыю турыстычнага сімвала Беларусі. Удзел у адборы работ змогуць прыняць усе жадаючыя аўтары.

Сярод прадстаўленых праектаў выберуць пераможцаў, якім абяцаюць грашовую ўзнагароду.

Як адзначылі ва ўрадзе, новы турыстычны сімвал павінен сфарміраваць моцны, пазнавальны і канкурэнтаздольны вобраз Беларусі.

«Адзіны візуальны сімвал стане ключавым інструментам пашырэння нацыянальнага турыстычнага прадукту на міжнародных рынках, маркерам якасці і стандарту беларускага сэрвісу, дапаможа кожнаму турысту ідэнтыфікаваць Беларусь як краіну, поўную адкрыццяў і камфорту», – адзначылі ў Саўміне.

Арганізацыю і правядзенне конкурсу даручана забяспечыць Нацыянальнаму агенцтву па турызме сумесна з партнёрамі.

Падрабязную інфармацыю пра ўмовы, тэрміны падачы заявак і патрабаванні да работ размесцяць у бліжэйшы час на афіцыйным сайце Нацыянальнага агенцтва па турызме.