Музыка, усмешкі і адзінства: як святкуюць Дзень Незалежнасці ў Мінску

Святочныя мерапрыемствы ў Дзень Незалежнасці ахапілі ўсю сталіцу: гэта маштабныя выставы ваеннай тэхнікі, канцэрты, народныя гулянні, патрыятычныя акцыі і спартыўныя актыўнасці.

Times.by паглядзеў, як 3 ліпеня святкуюць у цэнтры сталіцы, і спытаў у беларусаў, што для іх значыць гэты дзень.

За што любяць свята беларусы і што гавораць турысты

Ключавыя пляцоўкі свята ў цэнтры сталіцы – плошча Перамогі, Палац спорту і Верхні горад.

З боку Палаца спорту, побач з якім ідзе канцэрт, даносяцца знаёмыя словы з песні вядомага ансамбля «Сябры»: «А я лягу-прылягу край гасцінца старога, галавой на пагорак, на высокі курган». Нягледзячы на дождж, людзі прытанцоўваюць пад парасонамі пад любімую кампазіцыю.

На гэтай святочнай лакацыі мы сустракаем сям'ю са Смалявіч – Святлану і Дзмітрыя Чайкоўскіх. Звычайна яны адзначаюць Дзень Незалежнасці на Кургане Славы, але ў гэтым годзе маршрут вырашылі абнавіць і адсвяткаваць падзею ў цэнтры Мінска. Разам з сабой яны ўзялі трохгадовага сына Мацвея. У іх плане на дзень – наведаць парк Перамогі каля стэлы «Мінск – горад-герой» і пагуляць у раёне Палаца спорту.

«На наш погляд, Дзень Незалежнасці – самае галоўнае свята для краіны. І дзіця мы таксама выхоўваем у гэтым духу: глядзім ваенныя фільмы і расказваем, як усё было ў гісторыі», – гаворыць Святлана.

Яшчэ адна сям'я, якая святкуе Дзень Незалежнасці на пляцоўцы каля Палаца, – інтэрнацыянальная. Настасся Рамановіч нарадзілася ў аграгарадку Арэхаўка ў Клічаўскім раёне Магілёўскай вобласці.

Цяпер яна жыве ў іспанскім горадзе Гранада разам з мужам Хуакінам Гарсія. Настасся вучыцца ва ўніверсітэце на оптаметрыста і будзе ў будучыні правяраць людзям зрок і падбіраць акуляры. Хуакін працуе праграмістам. У Беларусь яны прыехалі на месяц у госці.

«Мужу-іспанцу ў нас вельмі спадабалася, – расказвае Анастасія. – З ежы ён палюбіў сырнікі, а вясковае жыццё запала ў душу дзякуючы цішыні».

«У іспанскіх вёсках ёсць бары і рэстараны, а тут – усё спакойна», – гаворыць Хуакін.

Яшчэ адна сям'я турыстаў на свяце Дня Незалежнасці ў цэнтры Мінска – Ганна і Вадзім Андронікі з пяцігадовай дачкой Ясеніяй. Яны прыехалі з Падмаскоўя.

«У Беларусі мы ўпершыню і ўжо пабывалі ў Нясвіжы: вельмі класнае месца! – гаворыць Ганна. – У Мінску прыемна пагуляць па горадзе – чыста, прыгожа, людзі ветлівыя».

У Дзень Незалежнасці Беларусі яны вырашылі прайсціся па цэнтры сталіцы і звярнулі ўвагу на канцэрт каля Палаца спорту.

«Я іграю на некалькіх інструментах і займалася вакалам. Магу адзначыць, што ў вас цудоўныя выканаўцы з шыкоўнымі галасамі. Да таго ж аранжыроўка дазваляе людзям атрымліваць асалоду ад свята», – адзначыла Ганна.

Пад адным парасонам уважліва слухаюць ваенную песню Уладзімір і Юлія. Для іх Дзень Незалежнасці – асноўнае свята ў годзе.

«Мы тут, каб ушанаваць памяць нашых дзядоў і прадзедаў, якія абаранілі нас ад нацызму», – коратка, але ёміста гаворыць Уладзімір.

У гандлёвай краме з вырабамі з ільну сустракаем Юлію Ліневіч, яна выбірае сукенку. Жанчына родам з Мінска, але апошнія дзесяць гадоў жыве ў Расіі. Кожнае лета яна прыязджае ў беларускую сталіцу з дзецьмі.

«Дзень Незалежнасці для мяне – гэта свята пра адзінства народа, – гаворыць Юлія. – Мне хочацца, каб дзеці пранікліся нашым нацыянальным беларускім духам. І яны, дарэчы, увесь год чакаюць, калі мы паедзем у Беларусь».

Хто ў гэты дзень працуе, каб мы святкавалі і адпачывалі

Каб свята прайшло лёгка, задзейнічаны многія службы і арганізацыі: на масавых мерапрыемствах у тым ліку дзяжураць медыкі, ратавальнікі, міліцыя, працуюць гандлёвыя кропкі і грамадскае харчаванне.

Пры гэтым на галоўных транспартных вузлах горада, якія суседнічаюць з месцамі масавых мерапрыемстваў, кантроль за бяспекай узмоцнены. Побач са станцыяй метро «Няміга» сёння ў тым ліку дзяжурыць камандзір роты Мінскага аддзела ўнутраных спраў на транспарце Яўген Салавей. На рабоце ён з шасці гадзін раніцы і адказвае за грамадскі парадак, забеспячэнне бяспекі грамадзян і аказанне дапамогі.

Дзень Незалежнасці для нашага суразмоўцы – двайное свята. Сёння дзень нараджэння ў яго мамы, Яўген паспеў яе павіншаваць з самай раніцы, яшчэ да таго, як заступіў на службу.

«Парушэнняў з боку грамадскага парадку няма, – гаворыць ён аб сваёй рабоце. – Але мы заўсёды гатовы да спынення супрацьпраўных дзеянняў і забяспечым бяспеку мінчан і гасцей сталіцы».

Недалёка ад сцэны на пляцоўцы каля Палаца спорту працуюць кропкі харчавання з летнімі тэрасамі, дзе можна паспрабаваць барбекю, шаўрму, смажаныя сардэлькі і шмат іншага.

Повар Дзмітрый Калмач і бармен Аляксандр Чарнікевіч сёння прачнуліся ў чатыры гадзіны раніцы і пачалі рыхтаваць прадукты для выязнога гандлю. Каля сямі гадзін яны ўжо былі на пляцоўцы каля Палаца спорту, каб пачынаючы з поўдня кожны з нас змог пакаштаваць сочны шашлык з марынаванай цыбуляй, гародніну і грыбы на грылі, кукурузу і, вядома ж, дранікі.

Суразмоўцы адзначаюць, што працуюць кожнае такое свята.

«Мы адпачываем, калі іншыя працуюць!» – усміхаючыся, гавораць яны і дадаюць, што з пазіцый меню на іх кропцы попытам карыстаецца абсалютна ўсё.

Гандаль беларускімі сувенірамі і ўпрыгажэннямі ручной работы – неад'емная частка святочных гулянняў. Мы падыходзім да лакацыі з завушніцамі, брошкамі і абадкамі на галаву з яркімі сінімі васількамі.

Тамара Якаўлева вырабляе такія работы з пластычнай замшы. У маладосці яна была інжынерам-канструктарам, а цяпер на пенсіі – рамеснік. Яе работы папулярны сярод пакупнікоў, большая іх частка – менавіта з васільком – сімвалам Беларусі.

Суразмоўніца лічыць Дзень Незалежнасці вялікім святам. «Дзякуючы гэтаму дню мы – свабодная краіна», – гаворыць яна.

Што стане кульмінацыяй свята

Пры ўваходзе на масавыя мерапрыемствы наведвальнікаў заўсёды аглядаюць, каб выключыць пранос небяспечных прадметаў. Сярод супрацоўнікаў органаў унутраных спраў, якія сёння працуюць на такім пункце пропуску каля стэлы «Мінск – горад-герой», знаходзіцца старшы інспектар групы кадраў Маскоўскага аддзела аховы сталіцы, лейтэнант міліцыі Вікторыя Лейчанка.

Яе змена пачынаецца вечарам, а заканчваецца ноччу пасля вялікага святочнага канцэрта і салюту, калі ўсе мы ўжо будзем раз'язджацца па дамах.

«Галоўнае ў маёй рабоце – пільнасць і вельмі якасны агляд. Мы ўсведамляем, што ад гэтага залежыць бяспека ўсіх і тое, як у цэлым пройдзе мерапрыемства. Людзі адносяцца да агляду з разуменнем: яны ведаюць, што мы гэта робім не з цікаўнасці, а каб засцерагчы ад небяспекі ўсіх», – адзначае яна.

Акрамя такіх відавочных рэчаў, якія ні ў якім разе нельга праносіць, як агнястрэльная, газавая і траўматычная зброя, забаронены, напрыклад, аэразольныя дэзадаранты, якія некаторыя жанчыны носяць з сабой у сумачках.

Таксама важна памятаць, што на масавыя мерапрыемствы нельга праносіць больш за 500 мл вады не ў шкляной тары. Такія рэчы заўсёды можна пакінуць у камеры захоўвання побач з пунктам пропуску і пасля святкавання забраць.

Вікторыя Лейчанка гаворыць, што гэта стэрэатып – лічыць, што служба ў органах унутраных спраў – толькі мужчынская прафесія.

«Працуючы ў міліцыі, мы нараўне з мужчынамі выконваем свае службовыя абавязкі, здаём нарматывы па фізічнай, баявой і агнявой падрыхтоўцы, баявым прыёмам барацьбы. Беларуская жанчына сапраўды можа ўсё і нават больш», – адзначае яна.

Як правіла, у такія святы, як Дзень Незалежнасці, Дзень Перамогі і Дзень горада, працуе і муж Вікторыі – ён таксама служыць у органах унутраных спраў.

Каля «Чыжоўка-Арэны» з праграмай выступілі міліцыянеры-кінолагі, а супрацоўнікі Цэнтра прафесійнай падрыхтоўкі Мінскага гарадскога ўпраўлення Дэпартамента аховы прадэманстравалі відовішчныя прыёмы самаабароны і акрабатычныя элементы.

«І ўсе гэтыя святы многа значаць для нашай сям'і, – гаворыць Вікторыя. – Дачцэ мы таксама прывіваем гэтыя каштоўнасці, каб яна расла патрыёткай і разумела, наколькі такія даты важныя і якой цаной яны дадзены. Нашы продкі ваявалі і дабіліся для нас мірнага неба, і вельмі хочацца, каб у будучыні над нашай галавой яно заўсёды было менавіта такім».

Кульмінацыя Дня Незалежнасці ў Мінску пройдзе менавіта каля стэлы «Мінск – горад-герой». Там будзе гала-канцэрт з удзелам зорак айчыннай эстрады, які завершыцца акцыяй «Спяём гімн разам» і святочным феерверкам. Яго запусцяць адразу з сямі пунктаў горада.