На Мінскім трыятлоне з’явіцца новая дыстанцыя 18+

У суме ўдзельнікі будуць бегчы, плыць і ехаць на веласіпедзе 226 км, але ёсць дыстанцыі і лягчэйшыя.

Міжнародны Мінскі трыятлон – 2026 адбудзецца 24–26 ліпеня, паведамілі арганізатары.

Упершыню на гэтых спаборніцтвах будзе прадстаўлена «жалезная» дыстанцыя – 226 км. Яна ўключае ў сябе плаванне 3,8 км, велагонку 180 км і марафонскі бег 42,2 км. Для «айранменаў» ужо даступны як індывідуальны фармат, так і эстафета камандай з двух-трох чалавек. На пераадоленне трыятлоннай гонкі ўдзельнікам даецца 16 гадзін.

Паводле даных арганізатараў, цяпер на поўную дыстанцыю ўжо заявілася 153 спартсмены, палова з якіх – беларусы. Яўка шмат у чым тлумачыцца даступнасцю: удзел у аналагічных стартах у Еўропе каштуе некалькі тысяч долараў, а мінскі старт у разы таннейшы.

Будуць і іншыя трыятлонныя дыстанцыі: «спрынт 25,75 км», «алімпік 56,5 км» і «палавінка 113 км».

Асобна пройдуць забегі і заплывы – на 750 метраў, 3, 5 і 10 км. Атрымаць медаль фінішора зможа кожны. Усе спаборніцтвы адбудуцца на адной пляцоўцы – тэрыторыі забаўляльнага комплексу «Аквапарк «Лябяжы».

Паводле слоў старшыні Беларускай федэрацыі трыятлона Дзмітрыя Талкачова, з’яўленне «жалезнай» 226-кіламетровай дыстанцыі – гістарычная падзея для гэтага віду спорту.

«Да поўнай дыстанцыі нам трэба было прыйсці – набраць пэўную колькасць беларусаў, якія актыўна займаюцца трыятлонам і гатовыя яе пераадолець. І вось з кожным годам аматараў трыятлона ў Рэспубліцы Беларусь становіцца ўсё больш, што вельмі радуе. Але не менш важна для нас, што ў 2026 годзе фестываль адкрыты для кожнага: хочаш – плыві тысячы метраў у адкрытай вадзе, хочаш – упершыню прабяжы 5 кіламетраў і атрымай медаль. Мы ўстаранілі любыя бар’еры для ўваходу ў спорт», – заявіў ён.

Мінскі трыятлон праводзіцца з 2018 года. Нагадаем, што ў гэтым годзе ў беларускай сталіцы пройдуць яшчэ адны міжнародныя спаборніцтвы па трыятлоне – IRONSTAR MINSK 2026. Яны адбудуцца ў першыя выхадныя лета, 6–7 чэрвеня.