«Прагулка» Марка Шагала застанецца ў Мінску да кастрычніка

Аб прадаўжэнні выставы дамовіліся прэм'ер-міністры Беларусі і Расіі.

Знакамітае палатно Марка Шагала «Прагулка» застанецца ў Мінску даўжэй, чым планавалася, – выстава ў Нацыянальным мастацкім музеі прадоўжана да кастрычніка бягучага года, паведамілі ў прэс-службе Міністэрства культуры Беларусі.

Паводле даных ведамства, такое рашэнне было прынята на перагаворах прэм'ер-міністраў Беларусі і Расіі Аляксандра Турчына і Міхаіла Мішусціна.

«Дасягнута дамоўленасць аб прадаўжэнні экспанавання шэдэўра Марка Шагала «Прагулка» са збору Дзяржаўнага Рускага музея ў Нацыянальным мастацкім музеі Рэспублікі Беларусь», – гаворыцца ў паведамленні.

У Мінкульце ўдакладнілі, што гэта асабліва сімвалічна, паколькі навіна стала своеасаблівым падарункам для ўсіх паклоннікаў творчасці майстра ў яго дзень нараджэння – 6 ліпеня.

Як раней пісаў Times.by, «Прагулку» Марка Шагала прывезлі ў Нацыянальны мастацкі музей 5 красавіка. Асабліва каштоўны экспанат суправаджала ваенізаваная ахова. Адкрыццё «Выставы аднаго шэдэўра» адбылося 8 красавіка.

Планавалася, што карціна будзе экспанавацца ў Мінску да 6 ліпеня.