Расіяне складаюць 86% ад усяго турыстычнага патоку ў Мінску

Грамадзян суседняй краіны ў Мінску цікавіць гісторыка-культурны і гастранамічны турызм.

Госці з Расійскай Федэрацыі складаюць 86% ад усяго турыстычнага патоку ў Мінску, паведаміў дырэктар інфармацыйна-турысцкага цэнтра «Мінск» Аляксей Русакевіч.

«Паток расійскіх турыстаў складае каля 86% ад усяго турыстычнага патоку, які ёсць у горадзе. У асноўным гэта індывідуальныя турысты, гэта каля 80%», – сказаў ён.

Паводле слоў Русакевіча, яны самі браніруюць гасцініцы, самастойна знаходзяць кватэры для арэнды.

Ён таксама расказаў, што гасцей з РФ у беларускай сталіцы цікавяць гісторыка-культурны і гастранамічны турызм, падзейныя мерапрыемствы, якія праходзяць у горадзе.

Дырэктар цэнтра адзначыў, што адкрыццё новых турыстычных пунктаў, новых лакацый садзейнічае павелічэнню патоку турыстаў.

Так, новы напрамак – наведванне прамысловых прадпрыемстваў – у мінулым годзе прыцягнуў больш за 70 тыс. экскурсантаў.

Аляксей Русакевіч таксама згадаў пляцоўку каля Палаца спорту, адкрытую да 9 Мая, – добраўпарадкаваную зону адпачынку з міні-кавярнямі, гандлёвымі аб’ектамі і месцамі для рамеснікаў. На Дзень Перамогі там быў вялікі паток турыстаў, у асноўным таксама грамадзян Расіі.

Пры гэтым ён падкрэсліў, што ў аддзяленне інфармацыйна-турысцкага цэнтра, якое функцыянуе там, ужо звярталіся госці з Кітая, Латвіі і Францыі.