Сафійскі сабор у Полацку чакае рэстаўрацыя

Найстаражытнейшы сімвал хрысціянскай веры на беларускіх землях за сваю гісторыю зведаў некалькі кардынальных рэканструкцый.

Нацыянальны Полацкі гісторыка-культурны музей-запаведнік размясціў на спецыяльнай пляцоўцы тэндар, прысвечаны рэстаўрацыі Сафійскага сабора.

Поўная назва дакумента выглядае наступным чынам: «Распрацоўка прадпраектнай дакументацыі па аб’екце «Рамонтна-рэстаўрацыйныя работы на помніку архітэктуры XI–XVIII стагоддзяў Сафійскім саборы па адрасе: г. Полацк, вул. Замкавая, 1».

Найстаражытнейшы праваслаўны сабор на беларускіх тэрыторыях з’яўляецца гісторыка-культурнай каштоўнасцю катэгорыі «0». Гэта азначае самую высокую ступень значнасці і рэжым аховы помніка. Такія аб’екты могуць прэтэндаваць на ўключэнне ў спіс ЮНЕСКА.

Урад раней зацвердзіў дзяржаўную праграму ў сферы культуры на бліжэйшыя пяць гадоў. Згодна з ёй на Сафійскі сабор плануецца выдзеліць BYN 2,4 млн для правядзення неабходных работ.

Рэстаўрацыйныя і рамонтныя работы на помніку архітэктуры ў Полацку плануецца правесці ў перыяд з 2026 па 2028 гады.

Сафійскі сабор у Полацку ў сярэдзіне XI стагоддзя пабудаваў знакаміты князь Усяслаў Чарадзей – як сімвал улады горада на Дзвіне, які не ўступаў Кіеву ці Ноўгараду.

На жаль, да нашага часу помнік дайшоў у значна змененым выглядзе. Галоўную перабудову храм перажыў у XVIII стагоддзі, пасля таго як у ім узарваўся парахавы склад расійскай арміі ў гады Паўночнай вайны.

Цяпер Сафійскі сабор у Полацку з’яўляецца помнікам архітэктуры, узведзеным у стылі віленскага барока.