Самазанятых у Беларусі чакаюць важныя змяненні з 1 ліпеня

Праз два месяцы ўступяць у сілу ключавыя новаўвядзенні па падатку на прафесійны даход.

Правілы для самазанятых у Беларусі мяняюцца з 1 ліпеня 2026 года, паведамілі ў Міністэрстве па падатках і зборах (МПЗ).

З гэтай даты для плацельшчыкаў падатку на прафдаход (ППД) уводзіцца мінімальны памер штомесячнай сумы – Br45. Яе неабходна будзе выплачваць нават у тыя месяцы, калі даходу не было і чэкі праз дадатак «Падатак на прафесійны даход» не фарміраваліся.

Для пенсіянераў, якія працуюць у якасці самазанятых, падатак меншы – Br18 (з улікам льготы па страхавых узносах у ФСАН).

Выключэнне за тры нявыплаты запар

Як расказаў прадстаўнік МПЗ Дзяніс Церашкоў, цяпер на падатковым уліку стаяць больш за 250 тыс. плацельшчыкаў ППД. Паводле яго слоў, для даўжнікоў уведзена мера адказнасці.

«У выпадку, калі ён на працягу трох месяцаў запар робіць аплату са спазненнем або не робіць зусім, то падатковы орган выключае гэтага плацельшчыка самастойна з плацельшчыкаў падатку на прафдаход. Пры гэтым у далейшым самастойна зарэгістравацца ў дадатку можна будзе толькі праз шэсць месяцаў», – растлумачыў Церашкоў у эфіры тэлеканала АНТ.

Тэрмін выплаты падатку на прафдаход – не пазней за 22-е чысло месяца, які ідзе за мінулым падатковым перыядам.

У МПЗ нагадалі, што з 1 студзеня 2025 года дзейнічае норма: калі самазаняты на працягу двух гадоў не перадае звесткі аб разліках праз дадатак, яго аўтаматычна выключаюць з сістэмы, і прымяненне ППД спыняецца.

Павышаны падатак

Акрамя гэтага, з 1 студзеня 2026 года ў Падатковым кодэксе ўдакладнена норма ў частцы прымянення павышанай стаўкі падатку для фізічных асоб, якія несвоечасова фарміруюць чэкі і інфармуюць падатковы орган аб правядзенні разлікаў.

«У гэтым выпадку, калі вы атрымалі плату за сваю паслугу ў наяўным парадку, чэк вам неабходна сфарміраваць адразу ж у момант атрымання паслугі і абавязкова перадаць яго спажыўцу. У выпадку, калі ён (спажывец) адмаўляецца, вядома, настойваць вы не можаце. У выпадку безнаяўнай аплаты чэк павінен быць сфарміраваны не пазней за 7-е чысло наступнага месяца», – адзначыў прадстаўнік МПЗ.

У выпадку парушэння фарміравання чэкаў самазанятаму давядзецца выплаціць падатак не 10% (агульная стаўка ППД), а павышаны – у памеры 20%.

У міністэрстве рэкамендуюць: калі вы зарэгістраваныя як плацельшчык падатку на прафдаход, але фактычна не ведзяце дзейнасць, варта разгледзець пытанне аб спыненні рэгістрацыі. У адваротным выпадку з 1 ліпеня давядзецца выплачваць мінімальныя Br45 у месяц нават пры нулявым даходзе.