Схадзіць у кавярню і на шопінг, паехаць у вёску: як жыхары Гродна праводзяць выхадныя

«У Гродне столькі прыгожых месцаў, дзе можна выдатна правесці час і зрабіць класныя фота. Мы шукаем цікавыя ракурсы, – дзеліцца дзяўчына. – У суботу або нядзелю абавязкова ідзём у кавярню ў цэнтры горада. Кава і ліманад – нязменны атрыбут маіх выхадных», – расказала Агата.

Часам вольныя дні дзяўчына праводзіць у бацькоў у Шчучыне. Там таксама ёсць сябры і любімыя месцы для адпачынку.

Спантанныя маршруты і лёгкая музыка

Тамары 61 год, працуе ў гандлёвай сферы па графіку «два праз два». Яе будні праходзяць у пастаянным руху і выхадныя таксама.

Яна называе сябе авантурысткай – у добрым сэнсе.

Можа проста сесці ў прыгарадны аўтобус і паехаць у любы пасёлак з гісторыяй. Менавіта так яна нядаўна адкрыла для сябе аграгарадок Свіслач, дзе пабывала ў былой сядзібе Красінскіх. Цяпер там размяшчаюцца кантора мясцовага СВК і музей.

«А колькі ў Гродне цікавых месцаў, атмасфера асаблівая. У гэтым горадзе дакладна дома не ўседзіш. Я родам з Гомельскай вобласці, але пераехала ў горад над Нёманам да дачкі. Атрымліваю асалоду ад прыгажосці і жыцця. Поўная энергіі і сіл», – дзеліцца жанчына.

Яна лічыць, што чалавек павінен сам сабе ствараць настрой. Яе ідэальныя выхадныя – пешыя доўгія прагулкі і лёгкая музыка.

Уік-энд для вялікай сям'і

У Ірыны падрастаюць чацвёра дзяцей ад 5 да 14 гадоў: два хлопчыкі і дзве дзяўчынкі. З такой вялікай камандай на выхадных дакладна не засумуеш, усміхаецца шматдзетная мама.

Па буднях яна працуе, цэлымі днямі на нагах, а суботу і нядзелю прысвячае сям'і. «Мы любім разнастайнасць. Часам у нас спартыўны ўік-энд: катаемся на веласіпедах або роліках, ходзім на каток. У іншы раз едзем у вёску да сваякоў – на шашлыкі і рыбалку. Бывае, арганізуем кулінарныя выхадныя», – расказвае Ірына.

Галоўным арганізатарам сямейнага вольнага часу выступае яна сама. Муж і дзеці, як правіла, згаджаюцца адразу з яе ідэямі.

«Мама, не забудзь сказаць, што мы яшчэ любім хадзіць па магазінах», – нагадвае пяцігадовая Насця.

«Куды ж без гэтага», – аджартоўваецца Ірына. Нярэдка ў іх і шопінг-выхадныя.

Паміж IT і паездкамі на дачу

Леанід вучыцца на 4-м курсе Купалаўскага ўніверсітэта. Часам ён праводзіць выхадныя як тыповы студэнт-айцішнік: за камп'ютарам, гульнямі і ў сацсетках. Але часцей усё ж такі выбіраецца з дома.

«Звычайна мы з сябрамі гуляем у цэнтры. Абышлі ўжо ўсе знакавыя аб'екты і музеі. У Гродне наўрад ці засталося месца, дзе я яшчэ не бываў. Толькі праліўны дождж можа прымусіць мяне застацца дома», – дзеліцца хлопец.

Перыядычна субота і нядзеля ў Леаніда становяцца працоўнымі: ён едзе з бацькамі на дачу. Малады чалавек кажа, што не супраць і такой карыснай «забавы».

Лясны маршрут і вітамін D

Юлія зараз у дэкрэтным адпачынку. Хаця дачка ўжо пайшла ў дзіцячы сад, хатніх спраў хапае.

«Сцэнарый нашых выхадных звычайны: намотваем кругі па сваёй Дзявятоўцы [спальны мікрараён у Гродне] або едзем у лесапарк Пышкі. Ідэальнае месца: свежае паветра, няма гарадской мітусні і шуму. А на дзіцячых і спартыўных пляцоўках там можна і крыху размяцца», – дзеліцца Юлія.

Адзінае, чаго не любяць мама з дачкой, – халоднае надвор'е. Тады прагулкі скарачаюць.

У сонечныя дні бяруць ад надвор'я максімум, гуляюць шмат, каб атрымаць порцыю натуральнага вітаміну D.