Тры ўнікальныя для Беларусі віды кажаноў знайшлі ў нацпарку «Прыпяцкі»

Спецыялісты парку запісваюць сігналы кажаноў з дапамогай спецыяльных устройстваў.

Дадаць у асноўныя
крыніцы Google

Тры ўнікальныя для рэспублікі віды кажаноў выяўлены ў бягучым палявым сезоне назіранняў у Нацыянальным парку «Прыпяцкі», паведамілі ў запаведніку.

Там адзначылі, што вывучэнне рукакрылых звязана з пэўнымі складанасцямі з-за іх скрытнага спосабу жыцця і начной актыўнасці.

Для збору даных супрацоўнікі навуковага аддзела нацпарку выкарыстоўваюць сучасныя ўльтрагукавыя дэтэктары, якія фіксуюць эхалакацыйныя сігналы кажаноў.

За палявы сезон спецыялісты запісалі больш за 18 тыс. такіх сігналаў, якія яшчэ трэба будзе прааналізаваць, каб выключыць хібы ўстройстваў.

«Паводле папярэдніх даных, прыборы зафіксавалі прысутнасць цэлага шэрага рэдкіх і ахоўных відаў, сярод якіх гіганцкая вячэрніца (I катэгорыя аховы), вялікая начніца (рэдкі від для Беларусі), еўрапейская шыракавушка, вусатая начніца, паўночны кажанок, шэры вушан, малая вячэрніца», – сказалі ў нацпарку.

Акрамя таго, даследчыкі для пацвярджэння даных дэтэктараў праводзяць кропкавыя адловы кажаноў з дапамогай спецыяльных сетак.

На сённяшні дзень у нацпарку пацверджана пражыванне 10 відаў рукакрылых з 19, якія ёсць у Беларусі.

Сярод злоўленых асобін аказаліся тры ўнікальныя віды з Чырвонай кнігі – еўрапейская шыракавушка, малая вячэрніца і начніца Бранта.