У нацпарку «Прыпяцкі» плануюць «ажывіць» велізарнае балота

Вучоныя мяркуюць, што аднаўленне воднага рэжыму балота дазволіць прывесці яго ў нармальны прыродны стан.

Дадаць у асноўныя
крыніцы Google

Вялізнае балота плануюць аднавіць у Нацыянальным парку «Прыпяцкі», ужо падрыхтавана навуковае абгрунтаванне важнасці работ, паведамілі ў Інстытуце эксперыментальнай батанікі НАН.

Навуковыя дакументы пра аднаўленне балотных угоддзяў часткі масіву «Кандзель – Ялавец – Альхова» склалі супрацоўнікі лабараторыі геабатанікі і картаграфіі расліннасці інстытута і работнікі сектара экаінфарматыкі.

Быў праведзены аналіз шэрагу гістарычных карт, які паказаў, што векавое антрапагеннае ўздзеянне на балота прывяло да таго, што верхняя частка яго торфу высахла і мінералізавалася.

Дрэнаж гэтай часткі запаведніка прывёў яго біясістэмы ў тупік – вялікую частку плошчы займаюць балотныя сасоннікі і кусты.

Спецыялісты прагназуюць, што аднаўленне прыроднага воднага рэжыму ў балоце дазволіць «ажывіць» болей за 765,6 га яго плошчы, спыніць высыханне торфу і выкіды парніковых газаў.

Таксама гэта прывядзе да пашырэння тэрыторый з карэнным відам – багуновымі сасоннікамі – і скароціць плошчы з павышанай рызыкай прыродных пажараў.