Участкі ў 10 раёнах Гомельшчыны выключаны з радыяцыйна небяспечных зямель

Увогуле ў гаспадарчы абарот вернуць 1318,8 гектара, якія раней не выкарыстоўваліся.

Зямельныя ўчасткі ў 10 раёнах Гомельскай вобласці выведзены са складу радыяцыйна небяспечных зямель. Адпаведную пастанову падпісаў прэм’ер-міністр Беларусі Аляксандр Турчын, паведаміла прэс-служба ўрада ў аўторак.

Рашэнне было падрыхтавана для рэгулявання адносін у галіне забеспячэння ў рэспубліцы радыяцыйнай бяспекі.

Дакументам прадугледжваецца, што ўчасткі ў Брагінскім, Веткаўскім, Жлобінскім, Калінкавіцкім, Кармянскім, Лельчыцкім, Лоеўскім, Мазырскім, Рэчыцкім і Чачэрскім раёнах агульнай плошчай крыху больш за 940 гектараў не адносяцца да катэгорыі радыяцыйна небяспечных зямель адчужэння і дазволены для гаспадарчага выкарыстання.

Акрамя таго, урад вырашыў, што 378,7 гектара радыяцыйна небяспечных зямель адчужэння ў Веткаўскім і Брагінскім раёнах змяняюць статус на радыяцыйна небяспечныя абмежаванага гаспадарчага прымянення.

У Саўміне падкрэслілі, што агульная плошча зямель адчужэння Гомельскай вобласці, якія вяртаюцца ў абарот, складзе 1318,8 гектара.

Адзначаецца, што ўлады забяспечаць кантроль умоў выкарыстання гэтых участкаў і прадукцыі, якая на іх будзе вырашчана або выраблена.